Qoldirilgan konsertlar uchun xarid qilingan chiptalar o‘z kuchida qolmoqda – Madaniyat vazirligi

Madaniyat vazirligidan ma'lum qilishlaricha, ommaviy tadbirlarni o‘tkazishga ruxsat berilgan kundan boshlab, san'at saroyi ma'muriyati tadbirkorlar bilan kelishgan holda grafik asosida qoldirilgan konsertlarni tashkillashtirish rejalashtirilgan.

«Qoldirilgan konsertlar berilgandan so‘ng, yangi konsertlar rejaga kiritiladi.

Shuningdek, birinchilardan Yulduz Usmonova konsertining qoldirilgan kunlari qo‘yilishi ko‘zda tutilmoqda», dedi vazirlik matbuot kotibi Mavluda Asqarxo‘jayeva.

Ta'kidlanishicha, qoldirilgan konsert dasturlari uchun xarid qilingan chiptalar o‘z kuchini saqlab turibdi.

Eslatib o‘tamiz, kechiktirilgan konsertlar uchun chipta pulini qaytarib olishni istovchilar bo‘lsa, ularga pullari karantindan so‘ng qaytarib berilishi ma'lum qilingan.

Chiptani naqd pulda xarid qilgan muxlislar o‘z pullarini naqd shaklda qaytarib olishlari mumkin. Plastik karta orqali to‘lov qilganlarga esa mablag‘lari kartaga tushirib beriladi.