Ягона миллий ижтимоий ҳимоя: оилалар 3 тоифага ажратилади

Фармонга мувофиқ, 2026 йил 1 февралдан “Ижтимоий ҳимоя ягона реестри” ва Камбағал оилалар реестри негизида ягона Ижтимоий реестр шакллантирилади. У “Ягона миллий ижтимоий ҳимоя” ахборот тизимида юритилиб, давлат ижтимоий қўллаб-қувватлаш чоралари тақдим этиладиган оилалар (шахслар)ни аниқлаш ҳамда уларнинг ижтимоий-иқтисодий ҳолатини баҳолаш вазифаларини бажаради. 

Янги Ижтимоий реестрда оилалар ижтимоий-иқтисодий ҳолатидан келиб чиқиб қуйидаги тоифаларга ажратилиши белгиланган:

• “давлат таъминотидаги оила”;
• “камбағал оила”;
• “камбағаллик чегарасидаги оила”.

Фармонда тоифалаш мезонлари ҳам белгиланган. Хусусан:

“Давлат таъминотидаги оила” тоифасига — оила аъзолари меҳнатга лаёқатсиз ёки меҳнат қилиш имконияти чекланган бўлган, ҳар бир аъзога тўғри келадиган жами ўртача ойлик даромади минимал истеъмол харажатларидан кам бўлган оилалар киритилади;

“Камбағал оила” тоифасига — оила аъзолари меҳнатга лаёқатли ёки меҳнат қилиш имкониятига эга бўлган, ҳар бир аъзога тўғри келадиган жами ўртача ойлик даромади минимал истеъмол харажатларидан кам бўлган оилалар киритилади;

“Камбағаллик чегарасидаги оила” тоифасига — ҳар бир аъзога тўғри келадиган жами ўртача ойлик даромади минимал истеъмол харажатларининг 1 бараваридан 1,5 бараваригача бўлган оилалар киритилади. Шунингдек, бу тоифага:

аввал “давлат таъминотидаги оила” ёки “камбағал оила” тоифаларидан чиқарилган оилалар;

“маҳалла еттилиги” тавсияси асосида оғир ҳаётий вазиятга тушиб қолган деб топилган оилалар ҳам киритилиши мумкин.

Ягона реестр жорий қилиниши орқали ижтимоий қўллаб-қувватлаш чораларини тақдим этишда:

• эҳтиёжманд оилаларни аниқлаш механизми ягона базага жамланади;
• оилаларнинг ҳолати тизимли баҳоланади;
• ёрдам чораларининг манзиллилиги ва самарадорлигини ошириш кўзда тутилади.