Қурилиш вазирининг қариндошларига алоқадор компания 431 млрд сўмлик давлат буюртмасини олди. Бу – биринчи марта эмас

Тошкентдаги Мустақиллик майдонида жойлашган маъмурий бинони таъмирлаш ва унинг ёнидаги фаввора остига автотураргоҳ қуриш 431,5 миллиард сўмга тушиши мумкин. Бу ҳақда давлат харидлари порталига маълумот жойланган.

Марказий банкнинг 12 апрелдаги курсига асосан, 431,5 млрд сўм – 41 млн доллардан ортиқни ташкил этади.

Ушбу йирик давлат буюртмаси «Трест–12» АЖга берилган. Ушбу компания таъсисчилари орасида қурилиш вазири Ботир Зокировнинг ўғли ва турмуш ўртоғи ҳам бор.

«Газета.uz»нинг ёзишича, Тошкент шаҳар ҳокимияти ҳузуридаги «Ягона буюртмачи хизмати» инжиниринг компанияси 2019 йил 9 июль куни «Трест-12» компанияси билан буюртма шартномаси имзолаган. Шартнома имзоланган вақтда лойиҳа қиймати 207,82 миллиардга баҳоланган, уни тамомлаш санаси эса 2020 йил 31 декабрга кўрсатилган. Молиялаштириш манбаси тўлиқ давлат бюджети ҳисобидан.

2021 йил 29 март куни томонлар шартнома қийматини 431,52 миллиард сўмга оширишни кўзда тутувчи қўшимча шартнома тузган. Маблағнинг 113,6 млрд сўми 2019-2020 йилларда тўлаб берилган.

2GIS сервиси харитасига кўра, Шароф Рашидов шоҳкўчасидаги 5-уй –Мустақиллик майдонидаги «Эзгулик» аркаси ва Вазирлар Маҳкамаси орасида жойлашган 14 қаватли маъмурий бино. Илгари бу ерда Молия, Халқ таълими ва Маданият вазирликлари жойлашганди.

Ҳозирда бу бинода қайси идора ёки вазирлик жойлашгани номаълум. Давлат харидлари порталида жойлаштирилган ҳужжатларга кўра, реконструкцияни лойиҳалаштириш учун Вазирлар Маҳкамасининг 2019 йил 13 апрелдаги «Ўзбекистон Республикаси Президентининг Давлат хавфсизлиги хизмати моддий-техник базасини яхшилаш тўғрисида»ги 307-қарори асос қилиб келтирилган (ҳужжат очиқ манбаларда берилмаган).

«Трест-12» – Ўзбекистондаги энг йирик қурилиш компанияларидан бири

Корхоналар ва ташкилотларнинг ягона давлат реестри маълумотларига кўра, «Трест-12» компанияси 1994 йил 7 декабрда рўйхатга олинган. Асосий фаолият тури – нотурар бинолар қуриш. Раҳбар сифатида Фахриддин Назиров кўрсатилган. Акциядорлар орасида Тошкент ҳокимияти (51,1 фоиз), Муаззам Саидахматовна Зокирова (19,1 фоиз), Жасур Ботирович Зокиров (14,1 фоиз), Муҳайё Октябревна Зокирова (13,1 фоиз) ва яна 12 нафар жисмоний шахс кўрсатилган (2,6 фоиз).

«Газета.uz» маълумотига кўра, Жасур Зокиров ва Муҳайё Зокирова – қурилиш вазири Ботир Зокировнинг ўғли ва турмуш ўртоғи ҳисобланади. Аввалроқ унинг ўзи ҳам 2019 йил июлида (ўша пайтда у қурилиш вазирининг биринчи ўринбосари лавозимида эди, 1996-2011 йилларда эса «Трест-12» бошқаруви раиси бўлган) «Трест-12» акциядорларидан бири бўлган.

Компания тарихи «Боштошкентқурилиш» буйруғига мувофиқ, жамоат ишларини бажариш учун 12-трест ташкил этилган 1979 йилга бориб тақалади. Трест 1994 йилда «Ташкентстрой» ДАҚК «Трест-12» АЖга айлантирилган, 2000 йилда эса мустақил юридик шахс бўлган. 2017 йилда МЧЖга, 2018 йилда эса яна АЖга айланган.

2018 йил июлда Spot берган маълумотга кўра, «Трест-12» таркибига жами 3275 нафар ишчиси бўлган 10та ихтисослаштирилган структуравий бўлинма кирган, охирги 10 йилда бажарилган ишлар ҳажми 800 млн доллардан ортиқ.

«Трест-12» компанияси турли йилларда Вазирлар Маҳкамаси биноси реконструкцияси (2001), Сенат маъмурий биноси (2004), Молия вазирлиги биноси (2005), Сингапур менежментни ривожлантириш институти (2008) бинолари, «Бунёдкор» стадиони (2012), HYATT Regency меҳмонхонаси (2016) ва бошқа биноларни (2017 йилгача бўлган лойиҳалар компания сайтида берилган) қуриш билан шуғулланган. Компания жами 225дан ортиқ лойиҳани амалга оширгани хабар қилинган.

Охирги лойиҳалар орасида компания тендерсиз бош пудратчи этиб белгиланган Ислом цивилизацияси маркази қурилишини кўрсатиш мумкин. 2020 йил октябрь ҳолатига, лойиҳа қиймати 988,2 млрд сўм деб баҳоланган (жумладан, тадбиркор Алишер Усмонов ҳисобидан ҳам молиялаштирилган).

2020 йилда «Трест-12» хусусийлаштиришдан олдин тайёрлаш ва инвестициявий жозибадорлигини ошириш орқали оммавий савдоларда тўлиқлигича давлат акция пакетлари (улушлари) сотиладиган корхоналар рўйхатига киритилган.