Қурилиш вазирлигининг биноси 182,5 млрд сўмга сотилди

Қурилиш ва уй-жой коммунал хўжалиги вазирлигининг Шайхонтоҳур туманида жойлашган маъмурий биноси аукционда 182,5 млрд сўмга сотилди.

16 декабр кунги савдо 130,3 млрд сўм бошланғич нарх билан бошланди ва 8 та қадамдан иборат бўлиб, 1 соат-у 7 дақиқа давом этди.

Якунда 182,2 млрд сўмлик таклиф билан “O‘zshahar qurilish invest” МЧЖ ғолиб бўлди.

Сотилган объект – Абай кўчаси 6-уй манзилида, 0,5 гектар ер майдонида жойлашган. Умумий майдони – 11 725 кв.м.

Лот шартларига кўра, харидор бинода офис ва хизмат кўрсатиш фаолиятини йўлга қўйиши лозим.

Аввалроқ Қурилиш вазирлиги Янги Тошкентга кўчиб ўтиши ҳамда у ерда Транспорт ва Сув хўжалиги вазирликлари билан битта янги бинода жойлашиши маълум қилинганди.

O‘zshahar qurilish invest ҳақида

Корхона 2017 йилда давлат томонидан ташкил этилган бўлиб, турар жой биноларини қуриш билан шуғулланади. Устав фонди – 1 млрд сўм.

O‘zshahar qurilish invest 2024 йил 26 ноябр ҳолатига давлатники бўлган: компаниянинг 90 фоиз улушига Давлат активларини бошқариш агентлиги, 10 фоизига “Qurilish Invest Development” МЧЖ эгалик қилган.

Компания кейинчалик хусусийлаштирилган. 2025 йил 16 декабр ҳолатига, Қодиров Нуриддин Тўйиевич корхонанинг ягона таъсисчиси ҳисобланади. Раҳбар сифатида Саатов Бахтиёр Мамадиевич кўрсатилган.