Навоийда 1000 АҚШ доллари эвазига автосалондан шартнома олиб беришни ваъда қилган шахс ушланди

Навоийда автомашина харид қилиш учун шартнома олиб беришни ваъда қилган фирибгар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, ҳудуддаги МЧЖлардан бирида ҳайдовчи бўлиб ишловчи У.Ҳ. фуқаро И.нинг ишончига кириб, унга “Spark” машинасини 1 000 АҚШ доллари эвазига автосалондан навбатсиз олиш учун шартнома олиб беришни ваъда қилган. У келишилган пулнинг 500 АҚШ долларини олдиндан олган вақтида департамент ҳамда ДХХнинг вилоят бошқармалари томонидан ўтказилган тезкор тадбирда ашёвий далиллар билан қўлга олинган.

Ҳолат юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.

Олдинроқ Навоий давлат педагогика институтига ўқишга киритиб қўйишни ваъда қилиб, фуқародан 2000 АҚШ доллари олган ўқитувчи ушланганди.