Полосонни машҳур қилган шоир: Анвар Обиджон хонадонидан репортаж

Мустақилликнинг 34 йиллиги муносабати билан илм-фан, адабиёт, маданият ва санъат соҳаларини ривожлантиришга ҳисса қўшган бир гуруҳ марҳум олим ва ижодкорлар мукофотланди. Улар орасида Ўзбекистон халқ шоири Анвар Обиджон ҳам бор. У “Меҳнат шуҳрати” ордени билан тақдирланди. Kun.uz мухбири Олтиариқ туманидаги Полосон қишлоғида – шоир яшаган хонадонда бўлиб марҳум ижодкорнинг яқинлари билан суҳбатлашди.

{Yii::t(}

Ўтказиб юбориш 6s

Ўтказиб юбориш

“Акам билан битта ёстиқда улғайдик. Кейин у Самарқандга кетди ўқишга. Ўқишни тамомлаб армияга отланди. Тошкентда ишлаб юрган кезларида уни йўқлаб пойтахтга кўп марта борганман. «Ёш гвардия» нашриётида ишларди у пайтда.

Саид Аҳмад, Аҳмаджон Мелибоев, Хуршид Давронлар билан учрашиб, уларнинг кўп суҳбатини олганман.

Эркин Воҳидов, Саид Аҳмад Олтиариққа келса, мени кўрмасдан кетмас эди. Акам билан фахрланаман, у орқали кўплаб зиёли одамлар билан танишдим”, дейди Анвар Обиджоннинг укаси Тоҳир Обиджон.

“Оилада беш ўғил, бир қиз эдик. Уч укам ўтиб кетди. Анваржондан кейин яна икки укам ўтди. Анваржон президент томонидан тақдирланганига суюниб ўзимни қўярга жой топа олмай юрибман. Бир неча кундирки, хонадонимизда катта тўй”, дейди Анвар Обиджоннинг опаси Холисхон Раҳимова.

“Анвар Обиджон билан 50 йил бирга яшадик. Беш фарзандли бўлдик. 30 йил Тошкентда яшадик. Ниҳоятда болаларни яхши кўрар эди. Шунинг учун ҳам болалар шоири бўлди.

Оддий бир колхозчи оиласида туғилганман. 18 ёшга тўлмасдан турмушга чиқдим. Совчилар орқали танишганмиз. Бир-биримизни аввал кўрмаган эдик. Ижод қилишим, ёзишим керак дерди доим. Келажак авлод учун кўп ҳаракат қилишим керак деб кўп гапирарди.

Китоблари чет давлатларда чоп этиляпти ҳозир. Ҳиндистонда чиқди, ҳинд тили билан инглиз тилида. Мисрда чиқди, араб тили билан инглиз тилида. Қозоғистонда чиқяпти. Дарсликларига киритиляпти шеърлари. Турмуш ўртоғим билан фахрланаман. Ўзи ҳажвчи бўлгани учун кўп шеърлари қизиқарли, содда ва равон”, дейди Анвар Обиджоннинг турмуш ўртоғи Кароматхон Обиджонова.

Кўрсатувнинг тўлиқ қисмини Kun.uz'нинг YouTube саҳифасида тўлиқ томоша қилишингиз мумкин.

Сарвар Зиёев,
Сардор Мамиров,
Kun.uz