Мерц АҚШнинг Россия нефтига қарши санкцияларни юмшатишини қоралади

Германия канцлери Фридрих Мерц ва Норвегия бош вазири Йонас Гар Стёре 13 март, жума куни АҚШнинг Россия нефтига қарши санкцияларни юмшатиш қарорини кескин танқид қилди. Мерц Норвегиянинг Аннёйя оролида ўтказилган музокаралар чоғида шундай деди: “Мен жуда аниқ айтмоқчиман: ҳозир санкцияларни, қандай сабаб бўлишидан қатъи назар, юмшатишни биз нотўғри деб ҳисоблаймиз”.

Германия ҳукумати раҳбари қўшимча қилди: “Афсуски, Россия ҳанузгача музокараларга тайёрлигини намоён этмаяпти. Шунинг учун биз Москвага босимни кучайтиришда давом этамиз”.

Унинг айтишича, бир кун аввал “Катта еттилик” — G7 мамлакатлари етакчиларининг, жумладан АҚШ президенти Доналд Трамп иштирокида видеоконференцияси бўлиб ўтган.

“G7'нинг олти аъзоси бу — керакли сигнал эмас, деган жуда аниқ фикрни билдирди”, — деди канцлер.

Фридрих Мерц таъкидлашича, Вашингтоннинг Россияга қарши санкцияларни юмшатиш қарори ҳақида у фақат 13 март куни эрталаб билган.

“Яна такрорлайман: биз буни нотўғри деб ҳисоблаймиз. Ҳозир нархлар билан боғлиқ муаммо бор, аммо ҳажмлар билан боғлиқ муаммо йўқ”, — деди Мерц.

Шу билан бирга, у АҚШ маъмурияти айнан қандай сабаблардан келиб чиққанини тушуниб олишни исташини ҳам таъкидлади.

Норвегия бош вазири бу позицияни қўллаб-қувватлади. Унинг сўзларига кўра, томонлар Россия Украинага қарши урушни тўхтатмаётгани учун санкциялар муҳим, деган фикрда якдил.

“Россия энергетика соҳасидаги сигналларга энг сезгир. Шунинг учун юмшатишни айнан шу ердан бошлаш мутлақо нотўғри”, — деди у.

Йонас Гар Стёре қўшимча қилишича, Европа аллақачон аниқ сигнал юборган ва Россия энергия ташувчиларига қарамликдан халос бўлган.

Германия иқтисодиёт вазири Катерина Райхе АҚШ санкцияларининг юмшатилишига нисбатан босиқ муносабат билдирди. Унинг сўзларига кўра, бу енгилликлар “ҳажм жиҳатидан ҳам, вақт жиҳатидан ҳам чекланган”. Шунга қарамай, у бу қарор “Путиннинг ҳарбий хазинасини” тўлдириши мумкинлигидан хавотир билдирди.

Райхе шунингдек, агар энергия таъминотига таҳдид юзага келса, айниқса Форс кўрфази минтақасидан нефт етказиб беришга жуда боғлиқ бўлган Жанубий Корея ва Япониядаги вазиятни ҳисобга олганда, унинг баҳоси ўзгариши мумкинлигини истисно қилмади. Унинг айтишича, Германия ҳозирча бундай муаммога дуч келмаяпти.

Христиан-демократик иттифоқнинг ташқи сиёсат бўйича эксперти Родерих Кизеветтер rbb24 Inforadio радиостанциясига берган интервюсида АҚШ қарори туфайли Россия “яна яхши пул ишлаб топаётганини” айтди.

“Агар биз қарши чоралар кўрмасак, бу орқали Украина янада кучли босим остида қолади”, — деб қўшимча қилди у.

Сўл партия ҳамраиси Ян ван Акен АҚШ қарорини “икки карра нотўғри сигнал” деб атади. У RTL/ntv медиакомпанияси эфирида, Доналд Трампни назарда тутиб, шундай деди: “Унинг ўзи халқаро ҳуқуққа зид тажовузкор уруш олиб бормоқда, Эронни бомбалаяпти. Нефт нархлари осмонга чиқиб кетди. Ва шунда нима бўлади? У шунда халқаро ҳуқуққа зид Россия тажовузкор урушига бефарқмиз, дейди. Уларга нефт сотиш мумкин. Бу дунёга қандай сигнал?”

Бунга қарама-қарши равишда, сўл-консерватив “Сара Вагенкнехт иттифоқи” партияси Германия ҳукуматини Россиядан нефт харид қилишга қайта рухсат беришга чақирди. Партия ҳамраиси Фабио Де Мазининг айтишича, Германия АҚШдан фарқли ўлароқ, энергия ташувчилар нархи кескин ошиб бораётганига қарамай, Россия нефти ва газидан воз кечишда давом этмоқда.

У шундай деди: “Биз Шведт орқали Россия нефтини яна сотиб олишимиз, ортиқча фойдага солиқ жорий қилишимиз ва углерод йиғимини дарҳол бекор қилиш орқали ёнилғи нархларини сезиларли даражада пасайтиришимиз керак”.