Британиялик боксчи Энтони Жошуа Нигерияда жиддий автоҳалокатга учради

У ўтирган автомобил ҳаракатсиз юк машинаси билан тўқнашган, оқибатда камида икки киши ҳалок бўлган. Жошуанинг ҳаётига ҳеч нарса хавф солмаётгани маълум қилинди.

Фото: Ижтимоий тармоқлар

Ўта оғир вазн тоифасида собиқ жаҳон чемпиони Энтони Жошуа Нигерияда жиддий автоҳалокатга учради. Воқеа 29 декабр куни Огун штатидаги Лагос - Ибадан трассасида содир бўлгани таъкидланмоқда.

Маҳаллий ҳуқуқ-тартибот идоралари ва халқаро ОАВ маълумотларига кўра, Жошуа ўтирган автомобил ҳаракатсиз юк машинаси билан тўқнашиб кетган. Ҳодиса оқибатида камида икки киши ҳалок бўлган. Ҳодиса тафсилотлари аниқлаштирилмоқда, тергов ишлари олиб борилмоқда.

Спортчининг ўзи эса енгил жароҳат олган. У тиббий муассасага текширув учун олиб кетилган, шундан сўнг шифокорлар боксчининг ҳаётига ҳеч нарса хавф солмаётганини маълум қилган. Жошуанинг вакиллари унинг аҳволи барқарор экани ва шифокорлар назорати остида эканини маълум қилди.

Энтони Жошуа сўнгги кунларда шахсий ташриф билан Нигерияда бўлди. Боксчи оилавий илдизлари боғланган мамлакатга мунтазам равишда боради.

ЙТҲ сабаблари ва юзага келиши мумкин бўлган ҳуқуқий оқибатлар тўғрисидаги маълумотлар ҳақида хабар берилмади.

Энтони Жошуа - британиялик профессионал боксчи, супер оғир вазн тоифасида рингга чиқади. 1989 йил 15 октябрда Уотфордда (Буюк Британия) туғилган. Лондон-2012 Олимпиадаси чемпиони. WBA, IBF, WBO ва IBO собиқ жаҳон чемпиони. Ўз авлодининг энг муваффақиятли тижорий боксчиларидан бири, кучли нокаутли зарба ва атлетик жанг услуби билан танилган. 2025 йилда у бир йиллик танаффусдан сўнг рингга қайтди ва 2025 йил 19 декабрда Жейк Полни олтинчи раундда нокаут билан мағлуб этди.