Агар Путин ва Зеленский тинчлик шартномасини тузмаса, улар аҳмоқ бўлади – Трамп

АҚШ президенти Доналд Трамп Украина президенти Володимир Зеленский ва Россия президенти Владимир Путин ўртасида «улкан нафрат ҳукм сураётганини» айтди. Унинг сўзларига кўра, бундай вазият тинчлик музокараларига тўсқинлик қилмоқда. Бу ҳақда Америка етакчиси Давосдаги Жаҳон иқтисодий форумида сўзлаган нутқида айтиб ўтди.

Хусусан, Трампдан Украина ва Россия ўртасида тинчлик битими тузиш имкониятини яқин кўряпсизми, деб сўралди. У аввалига бу урушни тўхтатиш осон бўлишини ўйлаганини таъкидлади ва, хусусан, бошқа саккизта урушни ҳал қилишга муваффақ бўлганини такрорлади.

«Биласизми, Бирлашган Миллатлар Ташкилоти буни қилиши керак. Мен бундай қилмаслигим керак, бироқ бунинг аҳамияти йўқ», деди Трамп.

Шу билан бирга, унинг фикрича, уруш тугайди ва кўплаб одамларнинг ҳаёти сақлаб қолинади.

«Президент Зеленский ва президент Путин ўртасида катта нафрат ҳукм сурмоқда ва бу можарони ҳал қилиш учун ёмон ҳолат. Биз бу ғайритабиий нафрат билан тўқнаш келаётганимизни биламиз», деди Трамп.

Бироқ, шунга қарамай, АҚШ президентининг фикрича, Россия келишув тузишни хоҳлайди ва Украина ҳам келишув тузишни хоҳлашига ишончи комил.

«Ва биз бу келишувни амалга оширишга ҳаракат қиламиз... Менимча, биз етарлича яқинмиз, деб айта оламан», деди Трамп.

АҚШ президентининг таъкидлашича, Вашингтон Москва билан мулоқот қилаётган пайтда Россия томонидан президент Зеленский гўёки «бундай қилмайди» деган даъволар билдирилмоқда.

Шу билан бирга, Трамп сўзларига кўра, кейинчалик «Зеленский келишув тузишни хоҳлайди, Путин эса келишув тузишни истамайди», деган ҳолат юзага келяпти. АҚШ президенти бундай вазиятни «жуда мураккаб мувозанат» деб ҳисобламоқда.

Шунингдек, унинг фикрича, Россия-Украина уруши дронлар қўлланилаётган ва дронлардан ҳафтасига минглаб одамлар ҳалок бўлаётган қон тўкилишидир. Шу сабабли, унинг фикрича, урушни тўхтатиш керак.

«Мен кечроқ президент Зеленский билан учрашмоқчиман. Ўйлашимча, улар ҳозир шундай босқичда турибдики, бир жойга тўпланиб, келишувга эришиши мумкин. Агар шундай қилмаса, улар аҳмоқдир. Бу иккаласига ҳам тааллуқли. Биламан, улар аҳмоқ эмас. Аммо агар улар буни қилмасалар - улар аҳмоқдир», деди Трамп.

У ҳеч кимни хафа қилмоқчи эмаслигини, лекин Зеленский ва Путинга келишув тузишни маслаҳат беришини қўшимча қилди.