Сенат раиси бош прокурордан кундан кунга ошиб бораётган ёғ ва озиқ-овқат маҳсулотлари нархини назоратга олишни сўради

«Бу борада президент ва ҳукумат раисининг аниқ режалари асосида Бош прокуратура ҳузуридаги Иқтисодий жиноятларга қарши кураш департаменти билан биргаликда ўсимлик мойини аҳолига узлуксиз етказиб бериш ва унинг нархларини барқарор сақлаш бўйича тегишли ишларни олиб бормоқдамиз.

Бу борада ҳукуматга аниқ таклифимизни бердик. Кеча бош вазир билан гаплашганимизда шуни таъкидладилар. Яъни яқин кунларда амалий ишлар қилиниб, нархларни барқарорлаштириш чоралари кўрилади», дея Ниғматилла Йўлдошевнинг сўзларини келтирмоқда Kun.uz мухбири.

Танзила Норбоева мазкур масала юзасидан Сенат Бош прокуратура билан ҳамкорликка тайёр эканини ва бозордаги нарх-наво ҳолати Сенатнинг Суд-ҳуқуқ қўмитаси томонидан ҳам назоратга олинишини билдирди.

Эслатиб ўтамиз, Сенатнинг ушбу ялпи мажлисида ҳисобот берган Марказий банк раиси Мамаризо Нурмуродов озиқ-овқат нархлари кескин ошишига қарши қўлланиши кутилаётган чоралар ҳақида маълумот бериб, Ўзбекистонда озиқ-овқат нархлари барқарорлигини таъминлаш борасида ягона давлат стратегияси ишлаб чиқилаётгани, бу озиқ-овқат нархлари ошишини секинлаштиришини таъкидлаган эди.

Аввалроқ пахта ёғи ҳам кескин қимматлашгани, яқин ойларда нарх пасайиши кутилмаётгани хабар қилинганди.