Безорилик жинояти учун жазо оғирлаштирилади

Безорлик жинояти учун жавобгарлик чоралари янада кучайтирилиши мумкин. Бу ҳақда 14 апрель куни Олий Мажлис қуйи палатасида ўтган йиғилишда маълум қилинди.

Мажлисда депутатлар уюшган ва жамоат жойларидаги жиноятчиликка қарши курашишни кучайтиришга оид қонун лойиҳасини муҳокама қилди. Амалда уюшган гуруҳлар безорилик содир этгани учун кўп ҳолларда енгил жазо олаётганини, бу эса жазосизлик муҳити шаклланишига олиб келаётгани таъкидланди.

Қайд этилишича, қонун лойиҳасида безорилик жинояти учун жазо чоралари оғирлаштирилмоқда. Ҳужжат асосида бир гуруҳ шахслар томонидан, такроран қурол ишлатиб ёки жамоат тартибини сақлаётган шахсларга қаршилик кўрсатган ҳолда содир этилган безорилик учун жазо кучайтирилади.

Қонун билан Жиноят кодексининг 277-моддасига алоҳида 4-қисм билан тўлдириш киритиш таклиф этилди. Янги нормада уюшган гуруҳ томонидан ёки баданга оғир шикаст етказиб содир этилган безорлик учун 8 йилдан 10 йилгача озодликдан маҳрум қилиш жазоси белгиланади. Амалда безорлик оқибатида баданга қасддан оғир шикаст етказганлик учун 5 йилдан 8 йилгача озодликдан маҳрум қилиш жазоси белгиланган.

Қонун лойиҳасига кўра, мансабидан фойдаланиб жиноий гуруҳга ҳомийлик қилганлик учун озодликдан маҳрум қилиш жазоси белгиланмоқда. Таклиф жиноий уюшма фаолиятини молиялаштирган шахсларга нисбатан жазони ўташдан муддатидан илгари озод қилишни қўлламасликни ҳам ўз ичига олади. Агар жиноий гуруҳни молиялаштирган шахс ҳокимият органларига ўз вақтида хабардор қилиб, оғир оқибатлар олдини олишга ёрдамлашса, жавобгарликдан озод этилиши мумкин.

Ҳужжатда жанговар спорт турлари бўйича мусобақаларни ноқонуний равишда ташкил этганлик ёки ўтказганлик учун жиноий жавобгарлик белгилаш нормаси киритиляпти. Таҳлилларга кўра, 2025 йилда учта аралаш жанг (MMA) ва шунга ўхшаш мусобақалар ноқонуний равишда ўтказилган. Мажлисда қонун лойиҳаси биринчи ўқишда қабул қилинди.