Фарғона шаҳрида қалбаки минерал ўғит ишлаб чиқараётган яширин цех фаолияти фош этилди

Фарғона шаҳрида қалбаки минерал ўғит ишлаб чиқараётган яширин цех фаолияти фош этилган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департаментнинг Фарғона шаҳар бўлими томонидан ўтказилган тезкор тадбирда, фуқаро Н.Қ. яширин цех ташкил қилиб, «Аммofоs-Махам Ammophos» номи остидаги қалбаки ёрлиқлардан фойдаланиб минерал ўғит ишлаб чиқариб сотаётгани аниқланган. Яширин цехдан 1 дона қадоқлаш дастгоҳи ва 35 қоп минерал ўғит тайёрлашда қўшиладиган хомашё ашёвий далил сифатида олинган.

Шунингдек, фуқаро Н.Қ. «A.K.» МЧЖ раҳбари Ш. билан олдиндан тил бириктириб, яширин цехда ишлаб чиқарилган сифат сертификати бўлмаган «Аммофос» минерал ўғитини сохта ҳужжатлар орқали 46,8 миллион сўмга сотиб юборгани аниқланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатларни қалбакилаштириш) билан жиноят иши қўзғатилиб, тергов ҳаракатлари ўтказилмоқда.