«Олий мақсадлар қўйинг, миллатнинг умиди сиз бўласиз» — ҳалолликни фойдадан устун кўрувчи Умиджон Ишмуҳаммедов билан суҳбат

Ўзбекистон давлат жаҳон тиллари университети қошидаги академик лицей, 2001 йилда Тошкент молия институтини, 2004 йилда АҚШдаги Georgia State университетларини тамомлаган ҳамда Ўзбекистонга IDP IELTS, CELTA, Pearson, Cambridge, Khan Academy лойиҳаларни олиб кирган, ҳозирда Edu-Action лойиҳаси, Cambridge International University ва Cambridge International College асосчиси Умиджон Ишмуҳаммедов «Осмондаги болалар» лойиҳасининг 15-сони меҳмони бўлди.

{Yii::t(}

Ўтказиб юбориш 6s

Ўтказиб юбориш

Суҳбат ёшлар ўзлари учун кимни рақобатчи деб билиши, чет элда ўқишнинг афзалликлари, мустақил яшашдаги қийинчиликлар ҳақидаги фойдали тавсияларга бой ўтди. Қолаверса, ёшлар билан бир қаторда ота-оналар учун ҳам суҳбат давомида илгари сурилган мавзулар манфаатли бўла олади.

Иш фаолиятимнинг бошланиши

Америкада Cambridge университетини тамомлаб, у ерда бир йил ишлаганман. 2008 йилда Ўзбекистонга қайтганман ва шу йили уйландим. Ўзбекистонда биринчи ўзим хоҳлаган аудитор компанияда ишни бошлаганман. Бу компания дунёдаги энг зўр 4та компания қаторига кирарди. 2012 йилда халқаро CPA сертификатини Америкага бориб олиб келганман. 2013 йилда халқаро стандартларни банклар тизимига киритиш, яъни битта тугмачада автоматлаштириш бўйича лойиҳа пайдо бўлган. Бу 500 000 долларлик лойиҳа бўлган. Айнан шу ишни қилиш учун ишлаётган компаниямдан бир йиллик дам олиш олганман. Лойиҳани бажариш мобайнида 2014 йил ўзимнинг Edu-Action компаниямга асос солганман.

Cambridge International университетининг ташкил қилиниши

Ўқувчиларимиз IELTS имтиҳонидан паст балл олиб бошлаганида мен муаммо сабабини излагандим. Ўқитувчиларни ўқитиш муҳимроқ эканини тушунганман. Cambridge университети билан гаплашиб, уларнинг ўқув услубларини олиб кирганмиз. Таълимда жуда кўп лицензияга эгаман. Лекин ҳаммасини бирданига қўлламаяпман. Cambridge университетининг барча китобларига лицензия олганмиз. Ёшларни энди ўқитишни бошлаганимизда пандемия бошланиб қолди. Чет элда ўқиш имкониятлари ёпилиб қолди. Ўқувчиларимиз менга энди нима қиламиз, чет элга боролмаймизми, деган саволларни бера бошлади. Агар ҳақиқатан ҳам ўқишни хоҳлаётган бўлсангиз сизлар эмас, университетнинг ўзи келади дедим ва Pearson’нинг BTech лойиҳасини олиб кирдик. У ерга 200 нафар бола кирди. Улар 1 йил ўқиганидан кейин ўқувчиларнинг кўпчилиги ўқишни Ўзбекистонда давом эттириш кераклигини айтди. Бундан келиб чиқиб, мен олий мақсадларимдан бири бўлган — Cambridge International университетига лицензия олдим.

Cambridge университетининг миссияси

Cambridge университетига миссия қўйишда жуда ҳам қийналдим. Ота-онам менга сен бизнинг умидимизсан, сен миллатнинг умидисан, деган гапларни айтишди. Миллатнинг умиди деган сўзлар менга жуда катта таъсир қилди. Университет очишдан мақсадим — ёшларимизни илмли қилиш, саховатли бойларни кўпайтириб, эҳсонларни, закотларни катта қилувчи ёшларни кўпайтириш. Демак, Cambridge International университетида ўқиётган ҳар бир ўқувчи ота-онаси ва миллатнинг умиди бўлсин. Биз шу илмларни беришни хоҳладик ва бу илмларни берамиз. Олий мақсадимиз мана шулардан иборат. Университет миссиясини ҳам ота-онамнинг миллат умиди деган гапларидан келиб чиқиб, «Миллат умиди — илмли инсонлар ва саховатли инсонларни яратиш»ни мақсад қилиб қўйдик.

Cambridge университетида ўқимоқчи бўлганларнинг мақсади шундай бўлсин

Cambridge International университетида мен миллат умидиман деган ҳис билан, мен ўша миллат умидидаги саховатли бой, менман ўша миллат умидидаги илмли инсон дейдиган ҳиссиётда ўқийдиган болаларни кўргим келяпти. Айнан шуларгина келажагимизни, Ўзбекистон халқини, миллатимизни юқори чўққиларга олиб чиқишини хоҳлайман.

Омад ҳақида фикрим

Ёшлигимда университетга кираётганимда ёки олимпиадаларга бораётган вақтимда ҳожи бобомларнинг олдига бориб омадингни берсин деб дуо қилиб қўйинг, дердим. Ўша вақтлари омадга жуда ҳам ишонардим. Америкага борганимдан кейин бу фикрим буткул ўзгарди. Агар бир жой берилган бўлса-ю, Аллоҳ шунчалик адолатлики, унга иккита инсон кирмоқчи, аммо унга биттаси кира олади. Омадга бўлган фикримни ким киришга ҳақли — қайси бир инсон кўп тайёрланган бўлса, киришга кўпроқ ҳақли бўлса, деган шиорга ўзгартирдим. Биринчи ҳаракатингни қил, кейин таваккул қил, деган шиор менга катта рол бўлди. Сабаби, балки бу инсондан камроқ тайёрлангандирман, лекин Аллоҳ мени танлаганини, омадим келиб, у жойга мен кирганимни фақат кирганимдан кейин биламан. Буни ҳеч қайси инсон олдиндан била олмайди, ҳеч қайси инсон омад қачон келишини билмайди. Омадга таянадиган ёшларимиз бошида бошлашади, бу энг катта хато. Сиз бошида ўргансангиз, имтиҳонга кирганингизда айнан билганингиз учун осон бўлади, агар сиз бу нарсани билмасангиз, икки карра икки тўрт эканини билишда ҳам қийин бўлади. Шунинг учун ёшларимиз омадга таянаётган вақтда таваккулни охирига қўйинг. Имтиҳонга кирган вақтингизда қўлингиздан ҳеч нарса келмаса, ўшандагина Аллоҳга таваккул қилинг, унгача ҳаракатингизни қилинг.

Бугун ёшларнинг энг катта йўқотаётган нарсаси

Бизларнинг ёшлар энг катта йўқотаётган нарса — бу ўзини атрофидагилари билан солиштираётгани, мактабдаги билим даражаси билан солиштираётгани. Бу ҳамманинг бошимиздан ўтган, менинг ҳам бошимдан ўтган. Сизнинг рақобатдошингиз атрофингизда ёки мактабингизда эмас, у ҳозир Хитойда, Сингапурда, Ҳиндистонда MIT’га кириш учун тайёрланяпти. Мен ёшлар ўзини атрофидагилар билан солиштириб, энг зўрман дейишини ҳеч қачон хоҳламайман. Шу менинг энг катта хатом бўлган ва бу хато бошқаларда такрорланмаслигини хоҳлайман. Ёшларимиз миллат умиди, деганда ёниб чиқишларини хоҳлар эдим.

Ҳаётдан олган хулосам

Инсон ёшлигидан, катта бўлаётганида юришни ўрганади, юришни ўрганганидан кейин гапиришни ўрганади, гапиришни ўрганганидан кейин санашни ўрганади, санашни ўрганганидан кейин катта бўлишни, атроф-муҳитга қарашни ўрганади. Инсон бора-бора нафақат ўзи учун яшаши, балки фарзандлари учун ҳам яшаши муҳимлигини ўргандим. Олдинлари жуда кўп таваккал қилар эдим. Ҳозир эса мен нафақат ота-онам учун, балки фарзандларим учун яшашим муҳимлиги, фарзандлар ота-онаси билан ўсиши кераклигини хулоса қилдим. Инсон тақдири қандайлигини ва қанча умр берилганини билмайди. Шунинг учун инсон соғлиғини доим асрашга, ақли ва зеҳнини юқори даражада тутишга, фарзандлари учун тарбия мажбуриятини олганини хулоса қилишга ҳар доим аҳамият беришини билдим.