Аёллар ҳам машиналар билан ишлай олади – “полировка”чи қиз ҳикояси

3 йилдан бери машиналарнинг ташқи кўринишига ишлов бериш билан шуғулланаётган Мадина бу соҳа ортидан яхшигина даромад қилади. Шогирдларига соҳа сирларини ҳам ўргатиб келмоқда. У ўзи қилаётган меҳнати билан автохизмат соҳасининг бир йўналишини ривожлантиряпман деб ҳисоблайди.

Мадина Холиқова – Тошкент шаҳридаги автосервислардан бирининг асосчиси, 5 кишилик жамоа раҳбари ва бир нечта шогирдларнинг устози. У бундан 5 йил олдин машиналарни сайқаллаш, уларнинг ташқи кўринишига ишлов беришга қизиқиб қолади ва соҳани яхши ўрганиб олади. Ҳозир Мадинанинг автосервиси мижозларга тинимсиз хизмат кўрсатади.

“Микрофон қизларда” лойиҳасида Мадина бу йўналишга қандай қизиқиб қолгани, машиналар билан ишлашнинг аёл киши учун оғирликлари, иш шароитлари ҳақида гапириб берди.

“Қўғирчоқ ўйнаб катта бўлганман...”

Ҳозирги кунда машиналарни “полировка” қилиш ва уларга керамика суртиш ишларини амалга ошираман. Ўзимдан ташқари 5-6 кишилик кичик жамоамиз ва бир нечта шогирдларим бор.

Оиламизда ҳамма ўқимишли, мен ҳам олий таълимда ўқидим ва шу йил тугатяпман. Машиналарга охирги 5 йилда қизиқиб қолганман. Ўзи, аслида, болалигим қўғирчоқ ўйнаб ўтган. Бу автосервис танишларимдан бирига тегишли бўлгани учун бошида ҳазил билан “Менга ҳам ўргатасизми?” деб сўраганман ва шу-шу ўрганиб кетдим. Бошида “Қиз боласан, қила олмайсан”, дейишган. Лекин эпладим.

Ишим – стрессларни енгишга ёрдам берадиган йўналишда. Ҳам қилаётган ишим ўзимга ёққан: биз худди ғижимланган нарсани текислашга ўхшаш иш қиламиз. Ҳам хулқ-атворим киришувчан бўлгани учун мослашиб кетдим. Мана ҳозир 3 йилдан бери шу соҳада ишлаяпман, ҳар куни эрталаб уйғониб ишга келаман.

Уйимдагилар қаршилик қилишмаган. Бизда хоҳлаган нарсамизни қилиб кўришга рухсат беришарди. Лекин онам бошида оғир иш эмасми, деб хавотир олганди.

Мижоз топишга қийналмаганман

Мижоз топишга унчалик қийналмаганман. Сабаби мижозлар қайтага машинамизни аёл кишига топширсак, эътиборли ишлайди, деб ҳам ўйлашади. Бундан ташқари, Instagram ижтимоий тармоғи орқали ҳам ўз саҳифамни юритиб, қилаётган ишларимни қўйиб бораман.

Битта машинанинг хиралашган, чизилган жойларини ялтиратиб тайёр қилиш учун ўртача 2-3 кун вақт кетади.

Қизлар ҳам ўргана оладими?

Машиналарга ишлов беришни қизлар ҳам ўргана олади. Лекин ҳозирча бир нечта қиз менга “ўргатинг”, деб мурожаат қилган, бироқ “қийин экан”, деб ташлаб кетишди. Аммо чин дилдан хоҳлайдиган одам ўргана олади. Фақат қатъиятли бўлиш, қийинчиликлардан қўрқмаслик керак.

Қийинчиликлар ҳақида

Албатта, машина билан ишлашда жисмоний қийинчиликлар, мижозларга ишни топширишда қабул қилармикин деган хавотирлар бўлади. Бироқ ҳаммасидан ўтса бўлади.

Мақсад

Ҳозир мен ишлатаётган жой – ижара, ўзим хоҳлагандай автосервисни хоҳлаган дизайнда қуришни, одамлар мен қилган ишларни энг сифатли деб биладиган даражага чиқишни хоҳлайман.

Зилола Ғайбуллаева суҳбатлашди.
Тасвирчи ва монтаж устаси: Низомиддин Тошпўлатов, Маматжонов Зияддин.