Путинда 10 кун бор – Трамп Украинадаги уруш бўйича янги баёнот берди

АҚШ президенти Доналд Трамп тинчлик келишувига эришиш учун Россия президенти Владимир Путинга янги муддат белгилади. Энди Россияда бунинг учун 10 кун бор.

Бундай баёнот Трампнинг матбуот вакиллари билан мулоқоти чоғида янгради, унинг аудиоёзуви Оқ уй сайтида эфирга узатилди. Хусусан, ундан Россияга қарши санкциялар қачон жорий этилиши сўралди.

«Ўн кундан кейин. Биз божлар ва бошқа нарсаларни жорий қилмоқчимиз ва бу Россияга таъсир қиладими ёки йўқми, билмайман, чунки Путин урушни давом эттиришни хоҳлаётгани аниқ. Аммо биз божлар ва иккиламчи санкцияларни жорий қилмоқчимиз. Бу уларга таъсир қилиши ёки таъсир қилмаслиги ҳам мумкин», деди Оқ уй раҳбари.

Трамп муҳлат бугундан (29 июл) бошланишини айтди ва Россияга нисбатан эҳтимолий чекловларга хомашё бозорлари қандай муносабатда бўлиши ўзини «хавотирга солмаслигини» қўшимча қилди.

28 июл куни Доналд Трамп Россия ва Украина ўртасида илгари тузилган келишувга эришиш муддатини қисқартирди. АҚШ президенти Истанбулдаги Россия-Украина музокараларида олдинга силжиш йўқлигидан норози эканини айтди. У Россия билан бизнес олиб бораётган давлатларга нисбатан санкциялар жорий этиш билан таҳдид қилди.

Россияда урушни якунлаш учун 50 кун борлиги ҳақида Трамп 14 июл куни эълон қилганди – шу билан бир вақтда у Украинага янги қуроллар етказиб берилишига ҳам ваъда берди. У нима учун шундай муддат ўрнатганига изоҳ бермади.

АҚШ президенти 28 июл куни яна бир бор россиялик ҳамкасбидан ҳафсаласи пир бўлганини таъкидлади ҳамда унга Украинадаги урушни тўхтатиш учун берилган 50 кунлик муҳлатни қисқартирганини, энди у 10-12 кун эканини айтди.