Венесуэла мухолифати етакчиси Мария Мачадо Трампга ўзининг Нобел мукофотини беришга тайёрлигини айтди

Венесуэлалик мухолифатчи сиёсатчи, 2025 йилда тинчлик бўйича Нобел мукофотига сазовор бўлган Мария Корина Мачадо ўз мукофотини АҚШ президенти Доналд Трампга топширишга ёки у билан бўлишишга тайёр. Бу ҳақда Мачадо Fox News телеканалига берган интервюсида айтиб ўтди.

«Тинчлик бўйича Нобел мукофотини олганимни билганимда, уни Доналд Трампга бағишладим, чунки у бунга лойиқ деб ўйладим... Агар мен октябр ойидаёқ у бунга лойиқ деб ҳисоблаган бўлсам, тасаввур қилинг, ҳозир [Николас Мадуро ағдарилганидан кейин] қанчалик бу фикрда мустаҳкамландим», деди Мачадо.

Бошловчининг Трампга мукофотни беришни таклиф қилганмисиз, деган саволига сиёсатчи шундай жавоб берди: «Бу ҳали содир бўлгани йўқ. Аммо мен унга шахсан айтмоқчиманки, биз, Венесуэла халқи (чунки бу Венесуэла халқининг мукофоти) уни [мукофотни] унга беришни ва у билан бўлишишни хоҳлаймиз».

Мария Корино Мачадо Венесуэла парламенти депутати эди. 2012 йилда у президентликка номзодини қўйди. 2023 йилда у навбатдаги президентлик сайловида иштирок этиш ниятини эълон қилганида, давлат лавозимларини эгаллаш ҳуқуқидан маҳрум қилинди. 2012 ва 2024 йилларда Мачадо Николас Мадурога қарши намойишларга бошчилик қилган.

2025 йил октябр ойида Мачадо тинчлик бўйича Нобел мукофотини қўлга киритди. У буни «жабрдийда Венесуэла халқига» ва Доналд Трампга «ишимизни қатъий қўллаб-қувватлагани учун» бағишлади.

3 январ куни АҚШ махсус кучлари Венесуэла президенти Николас Мадурони ўғирлаб кетганидан сўнг, Мачадо венесуэлаликлар учун «эркинлик вақти келганини» айтди. Бироқ Трампнинг маълум қилишича, АҚШ Венесуэлани Мадуронинг эски сафдоши бўлган вице-президент Делси Родригес билан ҳамкорликда бошқармоқчи. Мачадо, Трампнинг сўзларига кўра, мамлакатда «етарлича қўллаб-қувватловга эга эмас».

The Washington Post манбаларининг хабар беришича, Трамп Мачадони қўллаб-қувватлашдан бош тортган, чунки Мачадо унга ўзи жуда хоҳлаган Нобел мукофотини бермаган. Трамп Мачадо «ғалаба қозонмаслиги керак эди» деб жавоб берди, аммо унга мукофот берилишини ўз қарорига ҳеч қандай таъсир кўрсатмаганини айтди.