Олти йиллик музокара. «Реал» Роналдуни қандай қилиб қўлга киритгани тарихи

«Аниқ билардим, агар улар 80 миллион фунт таклиф қилишса, Криштиану кетарди. Биз унинг Пиреней оролларига қайтиш ва Ди Стефано-ю Зиданлар кийган либосни ўз эгнида қандай туришини кўриш орзусидан қайтара олмасдик», - деб эслайди Алекс Фергюсон. 

2003 йилнинг 6 августида «Спортинг» ва «Манчестер Юнайтед» «Жозе Алваладе»да янги мавсумни очиб беришди. Ўртоқлик ўйинининг биринчи бўлими тугагач, ҳолдан тойиб, бир алфозга келиб қолган Жон О’Ши Фергюсонга юзланади:

«Мен умримда бунақа ўйинчини кўрмаганман. Босс, уни сотиб олайлик!»

«Ҳаммаси жойида. Уни дафтарчамга ёзиб қўйганман», - Ферги гўёки хотиржам кўринарди, аммо ичида ғалаён кўтарилгани аниқ. Ўйин тугашини кутмасдан, у ёрдамчисини клуб ижрочи директори Питер Кеньоннинг олдига жўнатганди - болакайни тезда сотиб олиш керак. 

Бир йил олдин Манчестерга «Спортинг»дан келган Карлос Кейруш орқали Фергюсон Роналду ҳақида хабар топиб улгурган, аммо майдонда илк бор кўраётганди.

- Пит, биз бу ердан усиз кетмаймиз.

- У шунчалик зўрми?

- Ана, Жондан сўра! Майдондан судралиб чиқиб кетди, ҳали унинг ўрнига захирадан футболчи туширишим керак.

Маълум бўлишича, «Реал» ҳам Роналдудан хабар топган ва «Спортинг»га 8 миллион фунт таклиф киритиб улгурган экан. Фергюсон ўйлаб ўтирмади - «9 миллион ваъда қил!»

2003 йилнинг 12 августида Роналду Манчестерга келди.

***
Жаҳон чемпионати. 2006 йил. Чорак финал. Португалия - Англия. Ёш Руни билан Карвалью тўқнашди. Ҳар иккаласи ҳам тўп учун курашаётганди, аммо Руни рақибининг оёғини босиб олди. Балки Орасио Элисондо Рунига қизил карточка кўрсатмоқчи ҳам эмасди, лекин Роналду аралашиб, қизил сўрай бошлади. Руни португалиялик клубдошини четга суриб юборди, лекин кеч бўлганди. Қизил. Ярим соатдан кейин Англия пенальтилар сериясида имкониятни бой берди ва уйига равона бўлди. Британия ороли энди Роналду учун «дўзахга айланиши» тайин эди.

Дарҳол Жорже Мендешнинг телефони тинмай жиринглаган, уларнинг ичида «Реал»дан қилинган чақирувлар ҳам бўлгани шубҳасиз. Аммо агент барча музокараларни кейинга сурди, аввал Фергюсон билан гаплашиб олиш керак эди. Криштианунинг ўзи кетмаса бўлмаслигини тушуниб турганди. Британия матбуоти эса, икки ёш юлдузнинг биргаликдаги илк машғулотини сабрсизлик билан кутарди. Аммо, йўқ, футболчилар ўзларини ҳеч нарса бўлмагандек тутишди.

«У ўз мамлакатини ҳимоя қилди, мен ўзимникини. Ҳа, у мени четлаттишларини талаб қилди, аммо мен ҳам биринчи бўлимда унга сариқ карточка олиб бергандим. Нима бўлибди шунга?», деди Руни.

Қизиқ. Аслида ҳаммасини Фергюсон бости-бости қилганди. Қизил карточкадан кейин у дарҳол Рунига қўнғироқ қилган ва Криш билан ярашиб, вазиятни чўзмасликни, тўғри интервью беришни сўраган эди. Руни мураббийнинг айтганини қилди, Роналду «Олд Траффорд»да қолди. «Реал»нинг навбатдаги уриниши ҳам бесамар кетди.

***
2006 йилнинг июлида «Реал» президентлигига Рамон Калдерон сайланди. У сайловолди дастурида Кака, Роналду, Роббен ва Фабрегасни сотиб олишга ваъда берганди.

2007 йилнинг январь ойида Марса Калдероннинг баёнотини чоп этди. У ва жамоа мураббийи Капелло мадридликларнинг асосий нишони сифатида Роналду эканини айтдилар. Британиялик журналистлар Каррингтонни ўққа тута бошладилар. Фергюсон ҳаммани тинчлантирди: «Биз ўзимиз сотмоқчи бўлган футболчиларнигина сотамиз. Криштиану Роналду сотилмайди».

Роналдунинг ўзи ҳам Кейруш ва Фергюсон унга Мадрид ҳақида гапиришни тақиқлаб қўйишганини айтади.

Ўша пайтларда «Реал» Роналду мисолида ёрқин ижрочига эҳтиёж сезарди. Капеллонинг италияликларга хос зерикарли футболи «Барселона» фонида чарақламаётганди. Ҳатто чемпионлик мавсуми ҳам мадридликларни овутмади, Капелло истеъфога чиқарилди.

Сал аввалроқ, Криштианунинг онаси Долореш ўғлининг «Реал»га келишини жуда исташини, орзу қилишини айта бошлаган, «Реал» либосини кийиб расмга ҳам тушиб берганди. Айнан ўша кунларда Роналду «Манчестер Юнайтед» билан янги шартномага имзо чекди.  

«Менга Испания ёқишини ҳамма билади. Қачондир у ерда ўйнашни истайман. Лекин ҳозир Манчестерда бахтиёрман. Агар ҳозир кетмасам, бир кун, балки икки, уч, тўрт, беш йилдан кейин кетарман - шундай бўлишига қарши бўлмасдим. Ҳозир эса, буюк клуб сафидаман», - дея интервью берди Криштиану.

Португалиялик ҳужумчи 2006/07 йилги мавсумда Премьер Лиганинг энг яхши футболчиси бўлди. Унинг ўйини кундан-кунга очилиб борар, трансфер қиймати эса, осмонга ўрлаётганди. 

****
«Реал»га Бернд Шустер келгач, ўйин яхши томонга ўзгара борди, лекин барибир ёрқин юлдузлар етишмасди. Калдерон яна Манчестер билан боғланди ва ҳеч қандай пулга трансфер амалга ошмаслигини эшитди. 2008 йил баҳорида «Реал» қаторасига тўртинчи бор ЕЧЛ 1/8 финалида мағлубиятга учради. Турнирда эса «Манчестер Юнайтед» ғалаба қозонди, Роналду «Олтин тўп»нинг асосий даъвогарига айланди.

«Менга Испания ва «Реал» ёқишини минг марта айтганман. Баъзида орзулар амалга ошмайди, аммо мен бир кун бу орзуим амалга ошишига ишонишда давом этаман. Манчестерда бахтлиман, лекин эртага нима бўлишини ҳеч ким билмайди», дерди энди Роналду.

2008 йилнинг 19 июнида, Португалия Европа чемпионатида немислардан мағлубиятидан сўнг футболчи янада очиқ гапирди ва икки клуб ўртасидаги ҳароратни янада ошириб юборди: «Реал»нинг таклифи ҳаётда бир марта бўлади. «МЮ» раҳбарлари ҳам, оилам ҳам менинг истакларимдан хабардор».
Ўз авторитетини сақлашга уринган «Юнайтед» «Реал»нинг ҳаддан ташқари агрессив трансфер сиёсати устидан ФИФАга арз қилди. Ферги эса Роналду ва Мендешни Кейрушнинг Португалиядаги вилласига таклиф қилди. Ва ўша ерда ўша машҳур сўзлар янгради:

«Калдерон нима деган бўлсаям, бу йили ҳеч қаерга кетмайсан. Сен Мадридга ўтмоқчи бўлаётганингни биламан. Аммо айнан ҳозир сени сотишдан кўра, отиб ташлаганим яхши. Сен яхши ўйнашда давом этсанг, сенга футбол тарихидаги энг баланд баҳони қўйишади ва ўшанда сен кетишинг мумкин. Агар ҳозир сени қўйиб юборсам, ҳаммасини, эътиборимни бутунлай йўқотаман. Сен қўзғалон қиласанми, ўйнашдан бош тортасанми, захирада ўтирасанми, менга фарқи йўқ, лекин ўйлайманки, иш бунгача бормайди. Шунчаки, айтмоқчиманки, бу йил сени қўйиб юборишмайди», - деб тушунтирди мураббий.  
Ростан ҳам Фергюсон Калдерондан қаттиқ жаҳли чиққанди. Ҳатто журналистнинг бу вазият ҳақидаги саволига жуда кескин жавоб қайтарди: «Сизлар менинг шу қароқчилар билан келишади деб ўйлайсизларми? Ҳеч қачон! Клублар ўртасида ҳеч қандай келишув йўқ ва бўлмайди ҳам!»

2008 йил 5 август куни «Реал» Рафаел ван дер Варт трансферини эълон қилди. Бу захира вариант сифатида кўрилаётганди. Роналдунинг ўзи вазият жиддий эканини англади ва узр сўраб, «МЮ»да қолишини маълум қилди.

«Мен бу вазиятни атайлаб содир этмадим ва ҳаммаси учун узр сўрайман. Мен бу мавсумда «Манчестер Юнайтед»да ўйнайман. Биз Фергюсон билан гаплашиб олдик ва бу қарор мен учун ҳам, клуб учун ҳам тўғри қарор эканини тушуниб етдик», - деди португалиялик юлдуз.

****
Декабрда Роналду ўзининг илк «Олтин тўп»ини олди. Бу орада Рамон Калдерон уч йил олдин сайлов натижаларини қалбакилаштиришда айбланиб, истеъфога чиқарилди. Унинг ўрнига вақтинча келган Виенте Болуда ҳам Роналду трансфери деярли ҳал бўлгани ҳақида гапира бошлади. 

Роналду дарҳол бу маълумотни рад этди: «Менга Манчестер ёқади. Бу ерда мен ўз уйимдек ҳис қиламан. Биз бир оиламиз».

2009 йилнинг 27 майида «Манчестер Юнайтед» ЕЧЛ финалида «Барселона»га имкониятни бой берди. Бир ой ўтиб эса, навбатдаги сайловларда ғолиб чиққан Флорентино Перес уч йилда амалга оширилиши керак бўлган йирик трансферларни мана шу ёзда амалга оширмоқчи эканини айтди.

У сўнгги икки йилдаги «Олтин тўп» соҳиблари Кака ва Криштиану Роналдуни назарда тутаётганди. Иккала трансфер ҳам бозорда рекордга айланиши кўзда тутилганди. Шунингдек, Риберини «Бавария»дан сотиб олиш ҳақида ҳам кўп ўйлашди. Айниқса Перес. Чунки, Роналду ҳақида Калдерон олдинроқ айтиб қўйгани учун ҳамма бу трансферни Калдерон амалга оширган дейиши мумкин эди. Пересга ўз ютуқлари керак эди. 

Лекин «Бавария» Рибери борасида музокара ўтказишдан бош тортди. Перес дарҳол дастлабки режага қайтди. Аввалига «Милан» раҳбари Адриано Галлиани билан яқин алоқалар ёрдамида Каканинг трансфери жуда тез ҳал бўлди. Кейин эса, Флорентино Глейзерлар билан боғланиб, 94 миллион евро таклиф қилди. Сэр Алекс бу сафар қарши бўлмади. Кейинчалик Глейзерлар бу келишув ғирт спорт нуқтаи назаридан бўлгани, пулнинг аҳамияти бўлмагани, шунчаки, «МЮ» бош мураббийи футболчини сотиш қарорига келганини айтди.

Перес «Реал» бошқарувига келганидан 32 кун ўтиб португалиялик юлдуз шартномага имзо қўйди. Бу билан Флорентино ўзининг аввалги президентдан қанчалик устунлигини намойиш этганди.

Орадан бир неча йил ўтиб, Фергюсон автобиографиясида Кейруш билан ўша 2003 йилнинг ёзида кечган суҳбатни эслади:

«У биз учун узоқ ўйнаб бера оладими?» - деб сўрайди Фергюсон.

Кейруш жавоб беради: 

«Алекс, агар Роналду биз учун беш йил ўйнаб берса, хурсанд бўлавер. Бирор португалиялик 17 ёшида бегона мамлакатга келиб, беш йилдан ортиқ қолгани тарихда бўлмаган».

Олтинчи йил бонус бўлган экан.

Манба: sports.ru