Исроил Мадримов: «Ҳар бир спортчимиз олтин медалга лойиқ» 

Хабарингиз бор, 18 август куни Индонезияда XVIII Осиё ўйинлари старт олади. Kun.uz мухбири ушбу нуфузли мусобақада иштирок этадиган бокс бўйича Ўзбекистон терма жамоасининг байроқдори Исроил Мадримов билан “Тошкент” халқаро аэропортида суҳбат уюштирди.

“Кайфиятлар аъло даражада. Тайёргарлик яхши ўтди. Байроқдор бўлишнинг ҳам масъулияти жуда катта. Бу нарсани кутмагандим. Лекин, шу нарса юкланганидан сўнг ўзимга ишонч ҳам ортди. 

Фақат ютуқ ҳақида ўйлаяпмиз, бошқа нарса йўқ. Қозоғистон, Филиппиндан кучли боксчилар бор. 

Умид қиламизки, терма жамоанинг ҳар бир аъзоси медални қўлга киритади. Сабаби ҳар бир спортчимиз олтин медалга лойиқ. Режамиз максимал даражада”, - дея айтиб ўтди Исроил Мадримов.