АҚШ Green Card дастурини вақтинча тўхтатиб туради

АҚШ президенти Доналд Трамп Green Card лотерея дастурини тўхтатиб туриш бўйича буйруқ берди. АҚШ ички хавфсизлик вазири Кристи Ноэм маълум қилишича, бунга Браун университетидаги отишмада гумонланаётган шахс мамлакат ҳудудига айнан шу дастур орқали кириб келгани сабаб бўлган.

«Браун университетидаги отишмада айбланган Клаудио Мануэл Невеш Валенте АҚШга 2017 йилда DV1 (Diversity Lottery – виза лотереяси) орқали кириб келган ва унга Green Card берилган. Бундай жирканч кимсанинг мамлакатимизга киришига ҳеч қачон йўл қўйилмаслиги керак эди», – деб ёзди у.

Вазир президент Трамп 2017 йилда ҳам ушбу дастурни тугатиш учун курашгани, ўшанда Ню Йоркда юк машинасида одамларни босиб кетиб, саккиз кишини ўлдирган ИШИД террорчиси ҳам АҚШга айнан DV1 дастури орқали кирган бўлганини эслатган.

«Президент Трампнинг топшириғига биноан, мен ушбу ҳалокатли дастур туфайли бошқа америкаликларга зарар етмаслигини таъминлаш учун АҚШ Фуқаролик ва иммиграция хизматларига DV1 дастурини зудлик билан тўхтатишни буюряпман», – деган Ноэм хоним.

13 декабр куни АҚШнинг Род-Айленд штати Провиденс шаҳрида жойлашган Браун университетида отишма оқибатида икки талаба ҳалок бўлган ва тўққиз киши яраланганди, қурбонлар орасида ўзбекистонлик талаба МуҳаммадАзиз Умурзоқов ҳам бор эди.

Ҳукумат бу қотилликда ва кейинроқ Массачусетс технология институти профессори Нуно Лурейрунинг ўлдирилишида португалиялик 48 ёшли Клаудио Мануэл Невеш Валентени асосий гумондор деб топган. У пайшанба куни ўз уйида жонсиз ҳолда топилди, у катта эҳтимол билан ўз жонига қасд қилган.

Green Card – АҚШда 1990 йилдан бери чет элликларга ҳар йили тасодифий равишда 50 мингта яшаш гувоҳномаси тарқатиладиган дастур (Марказий Америка мамлакатлари учун ҳар йили яна беш минг тур ажратилади). 2025 йил май ойида эълон қилинган лотерея натижаларига кўра, Ўзбекистон саралаб олинган ғолиблар бўйича мамлакатлар рўйхатида етакчилик қилган – 5564 киши. Кейинги ўринларда Жазоир (5526) ва Россия (5519) қайд этилган.

2025 йилги виза лотереяси учун қарийб 20 миллион киши ҳужжат топширган бўлиб, ғолибларнинг турмуш ўртоқлари билан ҳисоблаганда 131 мингдан ортиқ номзод танлаб олинган. Танловда ғолиб чиққандан сўнг, улар АҚШга кириш учун рухсат олиш мақсадида текширувдан ўтиши керак бўлади.