Ҳамид Олимжон ва Зулфияхоним ҳаёти ва ижодига бағишланган бадиий фильм суратга олинмоқда

Маълум бўлишича, фильмда Ҳамид Олимжон ва Зулфияхонимнинг болалик даври ва ижодий фаолияти ҳақида ҳикоя қилинади. Унда жумладан, 1920-1940 йиллар воқеликларини кўриш мумкин. 

«Суратга олиш ишлари жорий йилнинг ноябрь ойида тугалланиши режалаштирилган бўлиб, шоир Ҳамид Олимжон таваллудининг 111 йиллиги муносабати билан декабрь ойида премьера бўлиши кутилмоқда. 

Фильмнинг суратга олиш ишлари Тошкент, Самарқанд, Жиззах вилоятлари ҳамда Қўқон шаҳрида бўлиб ўтмоқда. 

Фильм режиссёри Иброҳим Расулов, сценарий муаллифлари Микоил Сулайманов ва Зулфия Қуролбой қизи, постановкачи-оператор эса Талъат Мансуров», – дейилади агентлик маълумотида. 

Қўшимча қилинишича, «Муҳаббат баҳори»да бош ролларни  Ҳамза Ҳасанов (Ҳамид Олимжон), Шаҳноза Ҳожимуродова (Зулфия), Шоҳида Исмоилова, Абдурайим Абдуваҳобов, Меҳриддин Раҳматов ижро этган. Унда шунингдек, вилоят театрларининг кўплаб моҳир актёрларини ҳам кўриш мумкин. 

Фильм режиссёри Иброҳим Расуловнинг айтишича, «Муҳаббат баҳори»да Ҳамид Олимжон ва шоира Зулфияхонимнинг бир-бирига садоқати, уларнинг адабиётга қўшган ҳиссаси, Ҳамид Олимжоннинг арбоблик ишлари ҳақида сўз юритилади. 

«Фильмни суратга олиш ишлари юртимизнинг турли ҳудудларида бўлиб ўтмоқда. Жумладан, унинг маълум саҳналарини Ҳамид Олимжон яшаган ҳовлида ҳам суратга олиш режалаштирилган, - дейди у.