Кремл G7’нинг Украинага хавфсизлик кафолатлари тақдим этиш режасини Россияга таҳдид деб атади

G7 давлатларининг Украинага хавфсизлик кафолатларини тақдим этиш бўйича режалари «ўта хавфли потенциалга эга», бундай кафолатлар тақдим этилиши Россия хавфсизлигига дахл қилишдир, деган РФ президентининг матбуот котиби Дмитрий Песков. Бу ҳақда «Интерфакс» хабар қилмоқда.

«Украинага қанақа бўлмасин хавфсизлик кафолатлари тақдим этиб, бу давлатлар хавфсизликнинг бўлинмаслиги борасидаги халқаро принципларни ҳисобга олишмаяпти. Яъни улар Украинага хавфсизлик кафолатлари тақдим этиб, Россия Федерациясининг хавфсизлигига рахна солишмоқда», — дея огоҳлантирган Песков.

Песковнинг сўзларига кўра, бу «ўрта, узоқ, ҳаттоки яқин истиқболда ҳам ўта ва ўта салбий оқибатлар келтириб чиқариши мумкин».

Кремл матбуот котибининг қўшимча қилишича, бундай қарорлар қабул қилар экан G7 давлатлари амалда «Европани узоқ йилларга янада хавфли ҳудудга айлантиради». У яна Россия томонидан жавоб чоралари кўрилишига ҳам шама қилган: «Албатта, бу бизга ҳам ёмон таъсир қилади ва биз келгусида нималардан келиб чиқиб ҳаракат қилишимиз кераклигини ҳисобга олишга мажбур бўламиз», — деган Песков.

11 июл куни НАТО Украинани алянсга аъзо бўлиш жараёнини соддалаштиришга рози бўлди. Ташкилот бош котиби Йенс Столтенбергнинг сўзларига кўра, алянс аъзолари бирдамликка эришишса, барча шартлар бажарилса, НАТО Украинага аъзолик учун таклиф жўнатади. 

Кейинроқ у Ғарб давлатлари Украинага хавфсизлик кафолатларини тақдим этиб маълум бир таваккалчиликка йўл қўяётгани, бироқ тўлиқ «хавфсиз» вариантнинг ўзи йўқлигини таъкидлаган. «НАТО бўйича иттифоқчилар учун таваккалчилик элементларидан золи вариантнинг ўзи йўқ», —деган Столтенберг. У «Россия доим НАТОнинг кенгайиши бўйича барча фазаларга қаршилик қилиб келгани»ни таъкидлаган.

Украина 2022 йил сентябрида НАТОга тезлаштирилган тартибда аъзо бўлиш учун ариза топширган эди. Столтенберг ўшанда Киев учун «НАТО эшиклари доимо очиқлиги»ни таъкидлаб, бироқ Украинанинг алянсга аъзолигини муҳокама қилиш фақат унинг «ғалаба»сидан кейин имконли бўлишини айтганди.

Оқ уй эса уруш «динамик» эканлиги туфайли НАТО Украинанинг алянсга аъзо бўлиши борасида аниқ муддат белгилай олмаслигини эълон қилган. Шунингдек, Вилнюсда ўтаётган саммитда Украина НАТО аъзосига айлантирилса, НАТО ва АҚШ Россия билан уруш ҳолатига келиб қолиши ҳам таъкидлаб ўтилган.