Украинанинг “Европейская правда” нашри Давосда учрашув бўлиши мумкинлигини, аммо бу чоршанба куни эмаслигини маълум қилди.
Давосда нутқ сўзлар экан, Трамп Украина президенти битим тузишга тайёр эканига ишонч билдирди. “Менимча, айтишим мумкинки, биз бунга анча яқин келиб қолдик”, — деди у. АҚШ президенти Украинада қарийб тўрт йилдан бери давом этаётган уруш тўхтатилиши кераклигини яна бир бор таъкидлади.
Зеленскийнинг ўзи эса сешанба куниёқ, Россиянинг ҳаво ҳужумлари давом этаётгани сабабли мамлакат ичида унинг тезкор ҳал қилиниши лозим бўлган ишлари кўплигини айтган эди. У Швейцарияга фақат имзолаш учун тайёр ҳужжат бўлса ёки ёрдам бўйича янги, аниқ ваъда-мақсадлар пайдо бўлса — жумладан ҳаво ҳужумидан мудофаа воситаларини етказиб бериш бўйича — боришини билдирган.
Трамп нутқ сўзлашидан сал олдин Зеленский ўзининг Telegram-каналида Киевда ўтган ҳукумат йиғилишидан суратларни жойлади, у ерда энергия таъминоти билан боғлиқ вазият муҳокама қилинган. Россия Украина энергетика тизими объектларига оммавий зарбалар бергани оқибатида Украинадаги кўплаб шаҳарларда аҳоли узоқ вақт электр ва иситишсиз қолишга мажбур бўлмоқда.
