Канадада мамлакат тарихидаги энг оммавий қотилликлардан бири содир этилди

Канаданинг Британия Колумбияси провинциясидаги Тамблер-Риж шаҳрида 10 февраль куни тушдан кейин уйга, сўнгра мактабга қуролли ҳужум уюштирилди. Саккиз киши ҳалок бўлди: мактабда 39 ёшли ўқитувчи, 12-13 ёшли беш нафар ўқувчи (уч қиз ва икки ўғил), уйда эса 39 ёшли аёл ва 11 ёшли ўғил.

Яна 20 дан ортиқ киши турли даражада тан жароҳати олган. Уларнинг айримлари шифохонада ўта оғир аҳволда ётибди.

Ҳужум қилган аёл - 18 ёшли Жесси Ван Рутселаар ўзини отиб ўлдирди. Ҳужум пайтида у узун стволли милтиқ ва тўппончадан фойдаланган.

Полициянинг маълум қилишича, Ван Рутселаар ўз уйида онаси ва туғишган акасини ўлдирган. Уларни отиб ташлагач, ўзи аввал ўқиган мактабга борган (4 йил олдин ўқишни ташлаган). У ерга фавқулодда чақирув бўйича полиция етиб борди ва шундан сўнг ҳужумчи ўз жонига қасд қилди.

Ҳодисанинг эртаси куни полиция ҳужумчининг шахси ҳақида батафсил маълумот берди. Жесси Ван Рутселаар туғилганда ўғил бола сифатида қайд этилган, аммо тахминан олти йил олдин у трансгендер ўтишни бошлаган. Кундалик ҳаётда, жумладан, ижтимоий тармоқларда у ўзини қиз деб таништирган. Ҳуқуқ-тартибот идоралари вакилларининг таъкидлашича, уларда ҳозирча Ван Рутселаарнинг жинсий ўзига хослиги ҳужум билан боғлиқ деб ҳисоблашга асос йўқ.

Шунингдек, Ван Рутселаар уйидаги воқеалар туфайли полицияга бир неча бор қўнғироқлар бўлгани маълум. «Баъзи ҳолларда бу гумонланувчининг руҳий саломатлиги билан боғлиқ муаммолар эди», деган маълумотдан бошқа тафсилотлар келтирилмаган. Уни психиатрия текширувига юборишган. Кейинроқ, уйдан қонуний асосда сақланган ўқотар қурол олиб қўйилган, аммо кейин қайтариб берилган.

Ван Рутселлаар илгари қуролга эгалик қилиш лицензиясига эга бўлган, бироқ унинг муддати 2024 йилда тугаган. Унинг номига ҳеч қандай қурол рўйхатга олинмаган. Ҳужум жойидан топилган қуроллар кимга тегишли экани аниқ эмас.

Терговчилар на ўлим олдидан ёзилган хатни, на ҳужум сабаблари ҳақида бошқа бевосита кўрсатмаларни топди. Шунингдек, улар Ван Рутселаарнинг мактабда трансгендер ўтиш билан боғлиқ зўравонликка учрагани ҳақида ҳеч қандай далил топмади. Полиция маълумотларига кўра, у ёлғиз ҳаракат қилган ва катта эҳтимол билан ҳужум мақсади аниқ бир киши бўлмаган.

Тамблер-Риж бор-йўғи 2400 нафарга яқин аҳолига эга шаҳарча бўлиб, бошқа аҳоли пунктларидан узоқда жойлашган. Маҳаллий аҳолининг сўзларига кўра, у ерда «ҳамма бир-бирини танийди».

Канада бош вазири Марк Карни ҳалок бўлганларнинг оила аъзоларига ҳамдардлик билдирди. Мотам белгиси сифатида бутун мамлакат бўйлаб байроқлар туширилди, парламент ҳалок бўлганлар хотирасига бир дақиқалик сукут билан ҳурмат бажо келтирди. Таъкидланишича, Тамблер Рижга ҳужум Канада тарихидаги энг оммавий қотилликлардан бири бўлди.