Ҳудудга янги ҳоким тайинланса, ўша ерда экологик аудит ўтказилади - Президент

Қайд этилишича, бунинг учун далаларга сув етказадиган объектлар фермер ва кластерлар бошқарувига берилади. Сув етказиш тизимига Туркия, Испания, Хитой каби давлатлар тажрибаси кенг жорий қилинади.

Сув тежайдиган технологияни жорий қилган фермер ва деҳқонлар янада рағбатлантирилади. Бунга келгуси йилдан 10 фоизли кредит ажратилади, ўз ҳисобидан жорий қилганларга эса, харажатнинг 50 фоизи қоплаб берилади.

“Яшил макон” умуммиллий лойиҳасини янада кенгайтирамиз. Барча аҳоли масканлари, маҳаллаларда  “яшил майдонлар”ни кўпайтириш учун, йилига 400 миллиард сўм ажратиб борилади.

Шунингдек, барча давлат идоралари, корхоналар, олийгоҳлар ўзларининг “яшил боғлари”ни ташкил қилади. Энди, янги уй-жой қуришда пудратчиларга “яшил ҳудуд” ва автотураргоҳ барпо этиш мажбурий талаб қилиб қўйилади”, деди Шавкат Мирзиёев.

Билдирилишича, Оролбўйи минтақасидаги ўрмонзорлар келгуси етти йилда 2,3 миллион гектарга етказилади (ҳозирда 1,6 миллион гектар). 2030 йилгача республикада кўкаламзорлик даражаси 30 фоизга етказилади.

Тошкент шаҳрида амал қилаётган бошқарув компаниялари фаолияти жойларда ҳам жорий этилади. Барча қишлоқ ва шаҳарлар қаттиқ маиший чиқиндиларни тўплаш хизматлари билан 100 фоиз қамраб олинади, уларни қайта ишлаш эса, камида  65 фоизга етказилади.

“Бундан буён, ҳудудга янги ҳоким тайинланса, ўша ерда экологик аудит ўтказилади, натижалари жамоатчиликка эълон қилинади. Шунда, ҳудуд аҳолиси ҳоким олдига сув ва ҳаво тозалиги, кўкаламзорлаштириш даражаси бўйича аниқ масала қўя олади”, деди президентликка номзод.