RGCA раҳбари: “GII рейтинги Ўзбекистон ҳақиқатан ҳам жаҳон бизнес ҳамжамиятининг бир қисмига айланиб бораётганидан далолат беради”

Ўзбекистон халқаро рейтингларда жадаллик билан янги ўринларни эгаллаб бормоқда. Республикамизнинг иқтисодий ўзгаришлар йўлидаги муваффақиятининг яна бир тасдиғи Global Innovatsion Index 2022 ҳисоботи бўлиб, унга кўра мамлакатимиз 132 мамлакат ичида 82-ўринни эгаллади. Бу ютуқ ҳақида етакчи экспертлар ўз фикрларини билдиришди, жумладан “CA Research Group” бош директори Вячеслав Карпов бу борада ўз фикрлари билан бўлишди. 

“Ўзбекистоннинг Global Innovation Index’даги ўсиши тасодиф эмас, балки барқарорлик тенденциясидир: менимча, бугунги кунда бу барчага аён. Етти йил ичида 40 поғонага кўтарилиш муҳим ютуқ ва фахрланиш учун сабабдир. Тадбиркор сифатида, айниқса, “Бизнесни қўллаб-қувватлаш сиёсати” индикатори ўсишидан мамнунман, бу кўрсаткич бўйича биз дунёда 22-ўринни эгаллаб турибмиз. Бунинг ўзи Ўзбекистон ҳақиқатан ҳам жаҳон бизнес ҳамжамиятининг бир қисмига айланиб бораётганидан далолат беради. Мен буни RGCA амалиётида кўрмоқдаман: агар илгари йирик компаниялар бизнинг минтақамизни иккиламчи бозор деб ҳисоблаган бўлишса, бугунги кунда биз FMCG, молия ва фармацевтика соҳасидаги глобал етакчилар учун бозорларни ҳар томонлама ўрганиш ва таҳлилини ўтказмоқдамиз. Бу рейтинг республика бозорига янги ўйинчилар кириб келишига ҳисса қўшишига шубҳам йўқ”, — деди Вячеслав Карпов.

Global Innovation Index АҚШнинг Корнел университети, Франциянинг INSEAD бизнес мактаби ва Жаҳон интеллектуал мулк ташкилоти билан ҳамкорликда ишлаб чиқилган тадқиқотдир. У 81 кўрсаткичдан иборат бўлиб, иқтисодий ривожланишнинг турли даражаларида жойлашган мамлакатларнинг инновацион ривожланишини тавсифлайди. Рейтинг Бирлашган Миллатлар Ташкилоти Бош Ассамблеяси томонидан 2019 йилнинг 19 декабрида қабул қилинган Барқарор ривожланиш учун фан ва технологиялар бўйича резолюцияда қайд этилган. Ўзбекистон 2015 йилда 122-ўриндан жой олган ва шу тариқа етти йил ичида бирданига 40 поғонага кўтарилган.

Инновацион ривожланиш вазири Иброҳим Абдураҳмонов шундай деди: “2022 йилги ҳисобот “Инновацион ривожланиш келажаги” мавзусига бағишланган бўлиб, бу биз учун алоҳида аҳамиятга эга, чунки республикада амалга оширилаётган барча ислоҳот ва ўзгартиришлар жамиятни келажакда ривожлантиришга қаратилган. Бир қатор кўрсаткичлар бўйича Ўзбекистон нафақат макроминтақа, балки жаҳон миқёсида ҳам етакчи ўринларни эгаллаб турибди. Мисол тариқасида фан ва муҳандислик йўналишларидаги битирувчилар сонининг динамикасини келтириш мумкин, биз ҳайратланарли тарзда дунёда олтинчи бўлдик. Бундай мисоллар кўп ва биз уларнинг янада кўп бўлишини таъминлашга ҳаракат қилишни режалаштирмоқдамиз”.

Реклама