Россияда террорчилар учун ўлим жазосини жорий этиш таклиф қилинди

«Адолатли Россия — Ҳақиқат учун» партияси раиси Сергей Миронов Россияда террорчилар учун ўлим жазосини жорий этиш таклифини илгари сурди.

«Қотил террорчилар учун ҳақиқий адолатли жазо бу фақат ўлим бўлиши мумкин. Фракциямиз бир неча бор террорчилар ҳамда уларнинг шериклари учун ўлим жазосини тиклашни талаб қилган ва биз ушбу қарорга эришамиз. Террорчилик актини содир этганлар билан инсонпарварлик ўйнашни бас қилишимиз керак», — дейди Миронов.

Унинг таъкидлашича, «даҳшатли ва ноинсоний ҳаракат» Володимир Зеленский режимининг асл моҳиятини очиб берган. «Барчамиз болаларимиз келажаги ҳақида гапиришимиз керак бўлган кунда бандерачилар бегуноҳ одамларга оғриқ ва мусибат олиб келди», — дейди у.

Мироновнинг фикрича, Зеленский режими бутунлай йўқ қилиниши, «Украина можаросининг асосий сабаблари илдизи қуритилиши» ва Украинанинг нейтрал мақоми таъминланиши керак.

Олдинроқ Россия Конституциявий суди раиси Валерий Зоркин мамлакатда ўлим жазоси фақат янги конституцияни қабул қилиш орқали жорий этилиши мумкинлиги, бошқа йўл йўқлигини маълум қилганди.

31 май куни кечқурун қўшни Брянск областининг Вигоничский районида автомобил кўприги қулаганди, бу вақтда унинг остидан «Климов — Москва» йўловчи поезди ўтаётган бўлган. Ҳодиса вақтида кўприкдан юк машинаси ҳаракатланган. Натижада локомотив ва тўрт вагон релсдан чиқиб кетган. Етти киши ҳалок бўлиб, яна 66 киши жабрланган. Шунингдек, 1 июнга ўтар кечаси Курск областида темирйўл кўприги қулаб тушди.