1,2 миллион абитуриент учун муҳим кунлар – бакалавриатга кириш имтиҳонлари бугун, 8 августдан бошланди. Тест синовлари кетма-кет учинчи йилдирки очиқ ҳавода ўтказиляпти. Kun.uz мухбири Тошкентдаги “Пахтакор” стадионида бўлиб, имтиҳонларнинг илк сменасидан репортаж тайёрлади.
“Пахтакор” стадиони 4 та секторга бўлинган ва унда 2 280 нафар абитуриент учун ўрин яратилган. Тест синовлари 2 сменада: эрталаб 07:00 дан 10:00 гача ва кечки соат 19:00дан 22:00 гача ташкил қилинмоқда.
Абитуриентлар 2 та назорат пункти орқали ўтяпти. Дастлаб ички ишлар ходимлари абитуриентларнинг шахсини тасдиқловчи ҳужжатларни текширади.
ДТМ директори ўринбосари Сардор Ражабовнинг айтишича, ҳужжатлар ва абитуриент рухсатномаси кўздан кечирилаётган вақтда талабгорлар шахсни идентификациялаш камераларидан ўтишлари керак бўлади.
“Шундан сўнггина имтиҳон топширадиган ўринларига йўл олишлари мумкин. У ерда абитуриентларга сув, ручка, кепка, тест топшириқлар китобчаси ҳамда жавоб варақалари берилади”, – деди ДТМ вакили.
Сардор Ражабовнинг қўшимча қилишича, кириш имтиҳонларига шахсни тасдиқловчи ҳужжатларнинг исталган бири (ID карта, биометрик паспорт, хорижга чиқиш учун бериладиган паспорт (“қизил” паспорт), ҳайдовчилик гувоҳномаси ҳамда ҳарбий хизматчилар учун ҳарбий гувоҳнома)ни олиб келиш мумкин.
“Агарда абитуриентнинг шахсни тасдиқловчи ҳужжати қолиб кетса, ИИО ходимлари томонидан ҳужжатнинг 1-форма шакли тайёрланиб, махсус қурилмалар орқали фуқаронинг шахси тасдиқлангач имтиҳонларга қўйиб юборилмоқда”, – деди у.
Тест имтиҳонларига кечиккан абитуриентлар ҳам учради. ДТМ мутахассиси Ғайрат Бобоевнинг айтишича, кириш имтиҳонларининг биринчи куни илк сменасиданоқ 264 нафар абитуриент тест синовларида қатнашмади.
“Тест синовлари соат 7:00дан бошланиши белгиланган, лекин кўпчилик абитуриентларимизнинг масъулиятсизлиги сабабли кеч қолишлар бўляпти. Рухсатномада тест синови соат нечида, қаерда, қайси секторда бўлиши қайд этилган. Шунинг учун абитуриентларимиздан кечикмасдан келишларини сўраб қолардик.
Кечиккан абитуриентлар кириш имтиҳонида иштирок этишмайди, кейинги йил яна бир маротаба ҳужжат топшириб, имтиҳонга киришлари мумкин”, – деди ДТМ ходими.
Имтиҳонлар жами 2 та мутахассислик ва 3 та мажбурий фанлардан ўтказилмоқда. 90 та топшириқни бажариш ва жавобларини титул вароққа кўчириш учун 3 соат вақт ажратилади.
Тест синовлари турли ҳудудларда турлича муддатда, узоғи 20 августда якунланади.
Сардор Ражабовнинг сўзларига кўра, абитуриентлар қанча балл тўпланганини имтиҳон топширган кунининг эртасига билиши мумкин. Якуний танлов жавоблари, яъни мандат барча тест синовлари якунланганидан кейин, 1 ҳафта ўтиб, яъни 27 августгача эълон қилинади.
Эслатиб ўтамиз, имтиҳон ўтказиладиган жойнинг геолокациясини рухсатномадаги QR-код ёки ДТМнинг расмий сайти орқали билиб олиш ҳам мумкин.
Республика бўйлаб 58 та жойда бўлиб ўтаётган имтиҳон жараёнлари test2022.uz сайти орқали онлайн трансляция қилиб борилмоқда.
