Трамп Пентагонни “Уруш вазирлиги”га ўзгартиради

Оқ уйнинг маълум қилишича, Трамп мазкур қарорни бугун имзолайди. АҚШда II жаҳон уруши тугагунга қадар Уруш вазирлиги ва алоҳида Денгиз кучлари бўлган. Улар 1949 йилда расман Мудофаа вазирлигига бирлаштирилган ва янги бинога кўчиб ўтган.

New York Times’нинг ёзишича, Трамп маъмурияти – ҳарбий тузилмани қайта шакллантириш, унинг жанговар имкониятларини намойиш этиб, янада агрессив образга мослаштиришни кўрсатади, деб ҳисобламоқда. Трамп бу фикрни илк марта август ойида айтган ва Ҳегсетни «уруш вазири» деб атаган эди.

«Биз Уруш вазирлиги даврида ақл бовар қилмас тарихий ғалабаларга эришганмиз. 'Мудофаа' жуда ҳимоявий эшитилади. Биз ҳимояда бўлишни хоҳлаймиз, аммо зарурат туғилса, ҳужумкор ҳам бўлишимиз керак», деганди Трамп.

Пет Ҳегсет ҳам Пентагонни янги ном билан қайта брендлашни бир неча бор назарда тутган. Яқинда Fox News телеканалига берган интервюсида: «Биз Биринчи ва Иккинчи жаҳон урушларини Мудофаа вазирлиги билан эмас, балки Уруш вазирлиги билан ютганмиз», деганди. Март ойида эса у ижтимоий тармоқдаги саҳифасида номни ўзгартириш бўйича сўров ҳам ўтказган.

Флорида штатидан республикачи сенатор ва Трампнинг ашаддий тарафдори Рик Скотт ижтимоий тармоқларда бу ўзгариш Америка учун «урушларни ютиш қобилиятини, уларга фақат жавоб қайтаришни» акс эттиради, деди.

Ню-Жерси штатидан демократ сенатор Энди Ким эса бунга қарши чиқди. «Америкаликлар урушларнинг олдини олишни хоҳлашади, уларни мақташни эмас», деди у.

АҚШ Мудофаа вазирлигининг рамзий номи ҳам бор, бу — Пентагон. Бундай дейилишига сабаб, II жаҳон урушидан сўнг Вашингтонда қурилган вазирлик биноси беш бурчак шаклида. Пентагон бугунга келиб, нафақат рамзий ном, балки ОАВда АҚШ армияси маъносини ҳам англатади.

Мудофаа вазирлиги ва вазир лавозими Конгресс актлари орқали номланган, шунинг учун Трампнинг фармони дарҳол кучга кириши номаълум.