Зеленский Трамп билан навбатдаги учрашувини анонс қилди

Володимир Зеленский «яқин вақтлар ичида» Доналд Трамп билан учрашишни режалаштираётганини айтди. Украина президентининг сўзларига кўра, Украина Миллий хавфсизлик ва мудофаа кенгаши котиби Рустем Умеров унга «Америка томони билан навбатдаги контактлари» ҳақида ҳисобот берган. «Бир кунимизни ҳам бой бермаймиз. Яқин кунларда энг олий даражада – президент Трамп билан учрашишга келишиб олдик. Янги йилгача кўп нарса ҳал бўлиши мумкин», – деб ёзди Зеленский ўзининг ижтимоий тармоқлардаги саҳифасида. Учрашув қайси кунга режалаштирилаётганига аниқлик киритилмаган.

Kyiv Post нашрининг дипломатик манбаларга таяниб ёзишича, Зеленский Трампнинг Флоридадаги Мар-а-Лагодаги хусусий қароргоҳига бориши мумкин. Нашр суҳбатдошларидан бирининг сўзларига кўра, агар ҳаммаси режа бўйича кетса, бу ташриф 28 декабр, якшанба куни амалга ошади. Худди шу сана ва жой Axios нашри журналисти Барак Равид томонидан ҳам келтирилган.

Бир кун аввал Зеленский Трампнинг музокарачилари Стив Уиткофф ва Жаред Кушнер билан «жуда яхши суҳбат» ўтказганини айтганди. «Биргаликдаги натижа ва узоқ муддатли тинчлик учун иш бериши мумкин бўлган яхши ғоялар бор», – дея қўшимча қилган у.

Бу сафаргиси унинг Трамп билан учрашиш учун АҚШга қилаётган тўртинчи ташрифи бўлади. Уларнинг 2025 йил 28 февралда Овал кабинетдаги биринчи учрашуви можаро билан якунланган, унда Америка президенти Зеленскийни урушни тугатишни истамасликда, вице-президент Жей Ди Вэнс эса АҚШга ҳурмат кўрсатмасликда айблаганди.

Зеленский иккинчи марта Трамп билан август ойида Европа етакчилари иштирокидаги даврада учрашганди – бу учрашув АҚШ президентининг Аляксада Владимир Путин билан ўтказган музокараларидан бир неча кундан кейин бўлиб ўтганди. Бу галги ташриф анча дўстона руҳда кечганди.

Учинчи ва охирги бор Зеленский АҚШга Трамп билан учрашиш учун 2025 йил 17 октябрида борганди. Ўшанда томонлар Украинага узоқ масофага ҳаракатланувчи «Томаҳавк» ракеталарини етказиш масаласини муҳокама қилиши кутилганди, аммо Зеленский учрашувдан чиққач, бу мавзуда баёнот бермасликка қарор қилинганини айтган ҳамда «АҚШ эскалацияни хоҳламаётгани»ни қўшимча қилганди.

Зеленскийнинг Трамп билан учрашуви арафасида тинчлик режаси бўйича бир нечта асосий масалалар очиқ қолмоқда, улар орасида Запорижжя атом электр станцияси бошқаруви масаласи ҳам бор. Зеленский 24 декабр куни журналистлар билан учрашув вақтида бу борада муросага келинмаётганини айтганди. Вашингтон станциядан Украина, АҚШ ва Россия биргаликда фойдаланишини таклиф қилмоқда. Украина таклифи бошқача: Запорижжя атом электр станцияси АҚШ ва Украинани ўз ичига олган қўшма корхона бўлади – 50 га 50.

Шу кунларда яна бир эҳтимолий вариант пайдо бўлди. «Коммерсант» газетаси мухбири Андрей Колесниковнинг маълум қилишича, Запорижжя АЭС мавзуси 24 декабр куни Владимир Путиннинг йирик бизнес вакиллари билан ёпиқ учрашувида кўтарилган – ва у ерда станцияни Украина иштирокисиз Америка ва Россия биргаликда бошқариши масаласи муҳокама қилинган. Колесниковнинг таъкидлашича, АҚШ вакиллари Запорижжя атом электр станциясида «майнинг билан шуғулланишга қизиқиш билдирган».

Худди шу учрашувда Путин Украина ҳудудларини бўлиш талабини қўйишда давом этган. «Гап „Донбасс наш“ ибораси ҳақида кетмоқда. „Краматорск-Константиновск-Словянск тугуни кимга тегишлилиги масаласи муҳокама қилинмаслиги“ айтилган. Аммо Россия қисман ҳудудлар алмашинувини ҳам истисно қилмайди», – деб ёзади Колесников.

Зеленскийнинг тинчлик режасида эса «қаерда турган бўлсак, ўша ерда қоламиз» (яъни ҳудудларни ҳозирги фронт чизиғи бўйлаб бўлиш) ёки икки томон ҳам қўшинларни фронт чизиғидан олиб чиқиб кетиши ва у ерда эркин иқтисодий зона яратиш вариантлари таклиф қилинган.