Қолдирилган концертлар чипта пуллари карантиндан сўнг қайтариб берилади

Карантин даврида қолдирилган концерт дастурлари учун харид қилинган чипта пулларини карантин бекор қилиниб, кассалар фаолияти тиклангандан сўнг қайтариб олиш мумкин бўлади. Бу ҳақида Маданият вазирлиги ахборот хизмати Kun.uz’га маълум қилди.

“Карантин даврида қолдирилган концерт дастурлари учун чипталар ўз кучини сақлаб турибди. Чипталарни қайтариб беришни истовчилар кассалар фаолияти тиклангандан кейин ўз пулларини қайтариб олишлари мумкин бўлади. Нақд бўлса нақд пул кўринишида қайтариб берилади, пластик карта орқали тўлов амалга оширилган бўлса, картага маблағлар тушириб берилади.

Концерт дастурлари ва бошқа маданий тадбирларнинг яна қачон ўтказила бошланиши карантин чораларининг юмшатилишига боғлиқ”, дейилади ахборотда.

15 март санасидан бошлаб мамлакатда карантин режими жорий қилингани туфайли концерт дастурлари ва маданий тадбирларни ўтказиш номаълум муддатга қолдирилган эди.