АҚШ россиялик мутахассислар учун виза беришни соддалаштирмоқчи 

АҚШ президенти Жо Байден маъмурияти Қўшма Штатларга кўчиб ўтишни истовчи олий маълумотли россияликлар учун айрим виза талабларини бекор қилиш масаласини кўриб чиқмоқда. Бу ҳақда Bloomberg ўз манбаларига таяниб хабар берди.

Таклифлардан бирига кўра, россияликлар учун ишчи виза олишда иш берувчининг бўлиши талаб қилинмайди. Ушбу ғоя Конгрессга юборилди, деб таъкидлайди Bloomberg.

Мазкур чора фан, технология, машинасозлик ва математика соҳаларида АҚШ ёки бошқа мамлакатларда магистрлик ёхуд докторлик даражасини олган россияликларга тааллуқли бўлади.

АҚШ миллий хавфсизлик кенгаши вакилининг сўзларига кўра, Вашингтоннинг мақсади Россиянинг юқори технология ресурслари ва технологик базасини заифлаштириш ҳамда АҚШ иқтисодиёти ва миллий хавфсизлигини мустаҳкамлашдан иборат.

Маълумотларга кўра, Россия Украинада «махсус ҳарбий операция» бошлагандан бир ҳафта ўтиб мамлакатни 50 минг – 70 минг нафар IT-мутахассислар тарк этган. Уларнинг айримлари Ўзбекистонга кўчиб келган.