Путин КХДРга Украинадаги ҳарбий операцияни қўллаб-қувватлагани учун миннатдорчилик билдирди

Россия президенти Владимир Путин Шимолий Кореяга ташрифи арафасида Россиянинг Украинага қарши урушини қўллаб-қувватлагани учун Пхенянга миннатдорчилик билдирди. «Биз КХДРнинг Россиянинг Украинадаги махсус ҳарбий операциясини («СВО») кучли қўллаб-қувватлагани, муҳим халқаро муаммолар бўйича биз билан бирдамлиги ҳамда Бирлашган Миллатлар Ташкилотида умумий устуворликлар ва қарашларни ҳимоя қилишга тайёрлигини юксак қадрлаймиз», — деди Путин 18 июн, сешанба куни Кремл сайтида чоп этилган Шимолий Кореянинг «Нодонг Синмун» газетаси учун мақоласида.

Путин Россия ва КХДР «биргаликда саъй-ҳаракатлар билан икки томонлама ҳамкорликни янада юқори даражага олиб чиқишга» умид билдирди. Унинг сўзларига кўра, Россия ва КХДР «кўп қиррали ҳамкорликни фаол ривожлантиришда» давом этмоқда.

Стратегик ҳамкорлик шартномаси

Путиннинг Шимолий Кореяга давлат ташрифи билан келиши 18 июн оқшомида кутилмоқда. У ўтган йилнинг сентябрида Россияга ташриф буюрган Шимолий Корея етакчиси Ким Чен Иннинг таклифига биноан боряпти. Бу Путиннинг президент сифатида КХДРга иккинчи ташрифидир. У бу мамлакатга илк бор 2000 йилда Шимолий Кореянинг ўша пайтдаги раҳбари Ким Чен Ир таклифига биноан ташриф буюрган.

Ўнлаб йиллар давомида АҚШ ва БМТ санкциялари остида қолган Шимолий Корея камдан-кам ҳолларда хорижий ҳукумат раҳбарларини қабул қилади. Ғарб Пхенянни Россияга Украинага қарши уруш учун қурол ва ўқ-дорилар етказиб беришда айблайди. Айни дамда РФ ўзининг тугаётган арсеналларини тўлдириш йўлларини изламоқда.

Россия оммавий ахборот воситалари ёзишича, РФ президентининг КХДРга ташрифи чоғида икки давлат раҳбарлари бир қатор «муҳим ҳужжатлар», жумладан «стратегик шериклик» тўғрисидаги битимни имзолайдилар.

АҚШ ва Украина Путиннинг КХДРга ташрифидан хавотирда

Қўшма Штатлар КХДР ва Россия ўртасидаги муносабатларнинг чуқурлашиши ва бунинг Украина ҳамда Жанубий Корея хавфсизлиги учун юзага келиши мумкин бўлган оқибатларидан хавотир билдирди. «Биз Шимолий Кореянинг баллистик ракеталари Украина нишонларига зарба бериш учун қўлланаётганини биламиз. Бу Корея яриморолида хавфсизликка таъсир қилиши мумкин бўлган ўзаро ҳамкорликни юзага келтириши мумкин», деди АҚШ Миллий хавфсизлик кенгашининг стратегик алоқалар бўйича координатори Жон Кирби. 

НАТО бош котиби Йенс Столтенберг қайд этишича, Россия президентининг КХДРга ташрифи Путиннинг шундай етакчиларга қанчалик боғлиқ эканлигини кўрсатмоқда. Украина ташқи ишлар вазири Дмитрий Кулеба айтишича, Путиннинг КХДРга ташрифига энг яхши жавоб «Украинада адолатли ва мустаҳкам тинчлик ўрнатиш учун дипломатик коалицияни янада мустаҳкамлаш ҳамда Украинага янги Patriot ЗРК ва ўқ-дориларни етказиб бериш» бўлади.

Украинага қарши уруш бошланганидан кейин Путин хорижий сафарлар сонини кескин камайтирди. Айни дамда Россия кенг қамровли халқаро санкциялар остида. Халқаро жиноий суд РФ раҳбарини ҳибсга олишга ордер берган.