Қашқадарёда оилани яраштиришга борган профилактика инспектори пичоқланди

Қамаши туманида низоли оилани яраштириш учун борган профилактика инспектори 40 ёшли эркакнинг ҳужумига учради. Фуқаро унинг қўлидан пичоқни олаётган ходимга тан жароҳати етказган. Олган жароҳатига қарамай, профилактика инспектори фуқаронинг қўлидан ошхона пичоғини тортиб олиб, уни зарарсизлантирган.

{Yii::t(}

Ўтказиб юбориш 6s

Ўтказиб юбориш

Қашқадарё вилоятининг Қамаши туманида профилактика инспектори жанжалли вазиятда фуқаронинг қўлидан пичоқни олиш жараёнида жароҳатланди. Kun.uz ҳолатни ўрганди.

Маълум бўлишича, жорий йилнинг 29 январ куни Қамаши тумани Қоратепа маҳалласининг Шакар кишлоғида яшовчи 40 ёшли эркак 1990 йилда туғилган турмуш ўртоғи билан жанжаллашиб қолган.

Оилавий келишмовчиликдан сўнг аёл яшаш учун ота-онасининг уйига кетиб қолган. Икки кундан сўнг, яъни 31 январ куни эса у телефон орқали ҳудуд профилактика инспектори Илёс Ҳусановга жанжал юзасидан мурожаат қилган.

Профилактика инспектори фуқаро мурожаатига асосан уни турмуш ўртоғи билан яраштириш мақсадида маҳалла еттилиги вакиллари билан бирга борган. Бу ҳолдан норози бўлган эркак жанжал кўтарган ҳамда ўз фарзандини олиб кетмоқчи бўлган аёлга қўлидаги ошхона пичоғи билан таҳдид қилган.

Жараёнда профилактика инспекторлари Илёс Ҳусанов ва Азамат Турсунов эркакнинг қўлидан пичоқни олишга ҳаракат қилган. Шу вақтда ҳуқуқбузар пичоқ билан Илёс Ҳусановга тан жароҳати етказган. Олган жароҳатига қарамай, профилактика инспектори эркакнинг қўлидан ошхона пичоғини олиб, уни зарарсизлантирган.

Шундан сўнг жароҳат олган Илёс Ҳусанов тиббиёт бирлашмасига ётқизилган. 

“Ҳозирги кунда соғлигим яхши, шифокорлар керакли муолажаларни қилишмоқда. Бўлиб ўтган ҳолатда тан жароҳати оламан деб ўйламагандим. Мақсадим вояга етмаган бола ва фуқаролар тинчлигини сақлаш эди”, дейди Илёс Ҳусанов.

Профилактика инспекторининг қонуний талабига риоя қилмасдан пичоқ билан тан жароҳати етказган шахсга нисбатан Жиноят кодексининг 219-моддаси, яъни ҳокимият вакилига ёки фуқаровий бурчини бажараётган шахсга қаршилик кўрсатиш билан жиноят иши қўзғатилди.

Эркак процессуал тартибда ушланган. Ҳозирда тергов ҳаракатлари олиб борилмоқда.

Маълумот учун, ҳокимият вакилига ёки фуқаровий бурчини бажараётган шахсга қаршилик кўрсатиш жинояти БҲМнинг 50 бараваридан 100 бараваригача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари ёки бир йилдан уч йилгача озодликни чеклаш ёки бир йилдан уч йилгача озодликдан маҳрум қилиш билан жазоланади.