Трамп Сурия ва бошқа давлатлар фуқароларига АҚШга киришни тақиқлади

АҚШ президенти Доналд Трамп Америка ҳудудига кириши тўлиқ тақиқланган давлатлар рўйхатини кенгайтирди. Оқ уй сешанба, 16 декабр куни эълон қилган ҳужжатда айтилганича, 2026 йил 1 январдан кучга кирадиган янги чекловлар 20 та мамлакат ва ҳудудга тааллуқли бўлади. Шу тариқа, бу чора қўлланадиган давлатлар рўйхати икки баробарга оширилмоқда.

Эндиликда тўлиқ кириш тақиқи Буркина-Фасо, Лаос, Мали, Нигер, Сурия, Серра-Леоне ва Жанубий Судан фуқароларига, шунингдек Фаластин миллий маъмурияти берган йўл ҳужжатлари эгаларига ҳам татбиқ этилади.

АҚШга кириш бўйича қисман чекловлар эса қуйидаги давлатлар фуқароларига қўйилди: Ангола, Антигуа ва Барбуда, Бенин, Габон, Гамбия, Доминикан Республикаси, Замбия, Зимбабве, Кот-д’Ивуар, Малави, Мавритания, Нигерия, Сенегал, Танзания ва Тонга.

Хабарда бу чора хавфсизлик текшируви ва ахборот алмашиш тизимида доимий ва жиддий камчиликлар мавжуд бўлган давлатларга нисбатан қаратилгани таъкидланган.

Шу билан бирга, Вашингтон Туркманистон фуқароларига нисбатан ноиммиграцион визалар бўйича чекловларни бекор қилмоқда, аммо иммиграцион визаларни беришни тўхтатиб туриш сақланиб қолади. Бу Ашхобод АҚШ маъмурияти билан «самарали ҳамкорлик қилаётгани» ва шахсни аниқлаш ҳамда ахборот алмашиш тартиб-таомилларини такомиллаштиришда ўзгариш кўрсатгани билан изоҳланади.

Доналд Трамп биринчи президентлик муддатида Куба, Чад, Эрон, Ливия, КХДР, Сомали, Судан, Сурия, Венесуэла ва Яман фуқаролари учун шунга ўхшаш тақиқни жорий этган эди. Бу чорани Жо Байден бекор қилган.

Трамп биринчи муддатидаги тақиқни «ўта муваффақиятли» деб атаган ва у АҚШда террорчилик ҳужумларининг олдини олганини иддао қилган. «Биз кириш тақиқини қайта тиклаймиз ва радикал террорчиларнинг мамлакатга киришига йўл қўймаймиз», — деб баёнот берган эди АҚШ президенти.

Оқ уйга қайтганидан сўнг, 2025 йил июн ойида Трамп АҚШга кириш бўйича чекловларни яна жорий қилди — 19 та давлат фуқароларига нисбатан. Тўлиқ тақиқ Афғонистон, Ҳаити, Эрон, Яман, Ливия, Мянма, Сомали, Судан, Конго Республикаси, Чад, Экваториал Гвинея ва Эритрея фуқароларига татбиқ этилди, қисман тақиқ эса Бурунди, Венесуэла, Куба, Лаос, Серра-Леоне, Того ва Туркманистон фуқароларига нисбатан жорий қилинди.

Шу пайтда на Шимолий Корея, на Сурия тўлиқ ёки қисман тақиқ рўйхатига киритилмаган эди.