«Адолат» СДП вакили: «Инвесторлар Ўзбекистондаги куч ишлатар тизимлардан қўрқар эди»

Фото: Халқаро пресс-клуб

Авваллари Ўзбекистон куч ишлатар тизимлари инвесторларга жуда кўп тазйиқ ўтказар, мамлакатга келаётган инвесторлар бу тизимлардан қўрқар эди, деб таъкидлади «Адолат» социал-демократик партияси вакили Фазлиддин Зиёев.

Kun.uz мухбирининг хабар беришича, партия Марказий кенгашининг сектор мудири бу ҳақда душанба куни Халқаро пресс-клуб сессиясида гапириб ўтган.

Зиёев охирги уч йилда Ўзбекистонда инвесторлар учун шароитлар яратилиши замиридаги учта асосий омилни санаб ўтди.

«Инвесторларни рўйхатга олиш тизимининг енгиллашгани бу борада биринчи ўзгариш ҳисобланади.

Иккинчидан, конвертация тизимининг эркинлашиши. Тизимнинг рўйҳат бўйича айрим қатламлар учунгина эмас, ҳамма учун эркинлашиши инвесторларга катта қулайлик бўлди.

Инвестицион жозибадорликни оширишдаги учинчи ўзгаришни куч ишлатар тизимлардаги ўзгаришлар билан боғлаш мумкин. Охирги уч йилда кўрдикки, ҳар битта органнинг ходимлари сони қайта кўриб чиқилди ва уларнинг сони оптималлаштирилди. Авваллари куч ишлатар тизимларимиз томонидан инвесторларга нисбатан жуда кўп тазйиқ ўтказиларди.

Келаётган инвесторлар Ўзбекистондаги куч ишлатар тизимлардан қўрқар эди.

Уларга нисбатан тўсиқ ва талаблар рўйхатдан ўтишдаёқ бошланарди ва инвестор бу талабларни бажармаса, унга нисбатан турли тазйиқлар ўтказиларди», – дейди Фазлиддин Зиёев.