«Ургут» эркин иқтисодий зонаси янада кенгайтирилади, СамДУнинг Ургут филиали очилади

«Ургут туманида 500 мингдан ортиқ аҳоли яшайди. Бу Сирдарё, Навоий каби йирик вилоятларга яқин кўрсаткич. Ургут туманини ривожлантиришнинг алоҳида дастури албатта амалга оширилиши лозим. «Ургут» эркин иқтисодий зонасини янада  кенгайтириш ва ривожлантириш зарур.

Бир ой муддатда, Ургутни саноатни ривожлантиришга ихтисослашган инновацион ва инвестицион туманга айлантириш бўйича Вазирлар Маҳкамаси қарори киритилсин. Бунда, Ургут туманини тўлиқ эркин иқтисодий зонага айлантириш, вилоятнинг барча ҳудудларида «Ургут» эркин иқтисодий зонасининг филиалларини ташкил этиш назарда тутилсин.

Ушбу янги ҳудудларда инфратузилмаларни қуриш учун Араб мувофиқлаштириш гуруҳи институтларидан маблағ жалб этиш лозим. Шунингдек, «Ургут» эркин иқтисодий зонаси негизида «ҳолдинг компания» ташкил этилади ва унинг раҳбари бир вақтнинг ўзида вилоят ҳокимининг саноатни ривожлантириш бўйича ўринбосари бўлади.

«Ургут» эркин иқтисодий зонаси ва унинг филиалларида полиэтилен маҳсулотларини чуқур қайта ишлаш лойиҳаларига 500 миллион доллар, электротехника саноати лойиҳаларини амалга ошириш учун 250 миллион доллар жалб этиш чоралари кўрилади.

«Ургут» эркин иқтисодий зонасига берилган имтиёзларни барча туман ва шаҳарларга қўллаш ҳамда ҳар бирига камида 50-100 миллион доллар инвестицияларни жалб қилиш ҳисобига, 200 гектар майдонда умумий қиймати 1 миллиард долларлик қўшимча саноат лойиҳаларини амалга ошириш лозим. Ушбу лойиҳаларни сифатли ишлаб чиқиш ва ижросини тизимли таъминлаш учун Лойиҳалар фабрикасининг «Ургут офиси» ташкил қилинади.

Ургут туманини ижтимоий-иқтисодий ривожлантириш бўйича икки ой муддатда Ҳукумат қарори лойиҳаси киритилсин. Бунда, Самарқанд давлат университетининг Ургут филиалини ташкил қилиш ҳам назарда тутилсин. Вақти келиб бу филиалда тиббиёт факультетини ҳам ташкил қилишимиз керак. Чунки бизга малакали мутахассислар зарур», дея президентнинг сўзларидан иқтибос келтирмоқда Kun.uz мухбири.