Иқбол Солиев Озарбойжонда ушлангани ҳақидаги хабарларни рад этди

У бундай хабарни тарқатган ОАВ ва блогерлар устидан тегишли ташкилотларга арз қилишини айтган. Аввалроқ озар матбуоти мамлакат Ички ишлар вазирлигига таяниб Бокудаги клиникада рўй берган ҳолат ҳақида хабар берганди: Солиевнинг қабулига киришда катта навбат ва тартибсизлик юзага келгач, ҳолатга ойдинлик киритиш мақсадида у ушлангани айтилган ва бу хабар ўзбек медиасида ҳам ёйилганди.

Иқбол Солиевнинг видеомурожаатидан скриншот

“Қўқонлик табиб” номи билан танилган Иқбол Солиев ижтимоий тармоқларда оммавий ахборот воситалари ва блогерларга мурожаат билан чиқди.

Аввалроқ у Бокудаги клиникада сеанс ўтказаётганда “катта навбат ва тартибсизлик” юзага келгани, шу сабаб у ҳуқуқ-тартибот идоралари томонидан ҳолатга ойдинлик киритиш мақсадида ушлангани ҳақида озар матбуоти Озарбойжон Ички ишлар вазирлигига таяниб хабар тарқатган, бу хабар ўзбек медиасида ҳам ёйилган эди.

Иқбол Солиев ижтимоий тармоқларда тарқалган мурожаатида бу хабарни рад этган.

“Қачон мени полиция Озарбойжонда олиб кириб қамаб қўйди? Шу саволимга жавоб беринглар. Мен Озарбойжонда сеанс ўтказган бўлсам, халқнинг ичида сеанс ўтказдим, Аллоҳдан сўраб даволашга ҳаракат қилдим. Сенлар қачон кўрдинг мени полиция, ўша ердаги раҳбарият билан муаммо бўлганини? Қайси ташкилот йўлимни тўсди? Исботини айтинглар”, – деган у.

Солиев ҳозирда Ўзбекистонда, ўз уйида экани, юқоридаги ҳолат бўйича керакли ташкилотларга ариза ёзаётганини маълум қилган.

“Керакли ташкилотларга аризамни ёзишни бошладим. Сенлар билан керак бўлса судда ёки керакли ташкилотлар билан гаплашаман. Сенлар пул топиш учун туҳмат қиляпсанлар”, – дейди у.

Kun.uz Ўзбекистон Ташқи ишлар вазирлигидан олган маълумоттга кўра, Озарбойжон масъул идоралари Солиев билан тушунтириш ишлари олиб борган, лекин уни ҳибсга олмаган.