Хабиб Нурмагомедов UFC рейтингида пастлади

Америкалик аралаш яккакураш жангчиси Жон Жонс Мутлақ жангчилик чемпионатининг (UFC) барча вазн тоифалари ҳисобга олинган рейтингида россиялик Хабиб Нурмагомедовдан олдинга ўтиб олди. Тўлиқ рейтинг UFC сайтида эълон қилинган. 

UFC’нинг 2018 йилдаги охирги мусобақасида Жонс швециялик Александр Густафссонни мағлуб этиб, ярим оғир вазн тоифасида UFC чемпиони унвонини қўлга киритди. У бу натижаси эвазига рейтингнинг 2-ўрнига кўтарилиб олди.

Аввал бу ўринни эгаллаган Нурмагомедов 3-ўринга тушиб кетди. Рўйхатга эса оғир вазн тоифасидаги амалдаги чемпион, америкалик Дэниел Кормье етакчилик қилмоқда. 

Нурмагомедов ирландиялик Конор Макгрегорни мағлуб этгандан кейин 2-ўринга кўтарилиб олганди. 

Нурмагомедов бирорта жангини ютқазмаган, унинг ҳисобида 27 жангдан 27 ғалаба бор. Жонс эса октагонда 23 та ғалабага эришган ва бир жангида тақиқланган зарбаларни бажаргани учун унга мағлубият берилган. Унинг яна бир жанги бўлиб ўтмаган деб тан олинган.