Трамп Оқ уй ҳудудида UFC жанги ўтказилишини эълон қилди

АҚШ президенти Доналд Трамп 2026 йил 14 июн куни Оқ уй ҳудудида UFC шафелигида жанг ўтказилишини эълон қилди. Бу ҳақда Reuters хабар берди.

Сана тасодифан танланмаган - 14 июн 80 ёшга тўладиган Доналд Трампнинг туғилган кунига, шунингдек, АҚШ байроғи кунига тўғри келади.

Тадбир Оқ уйнинг Жанубий майсазорида (South Lawn) ўтказилиши режалаштирилган бўлиб, бу президент қароргоҳи ҳудудида профессионал спорт жанги ўтказиладиган биринчи ҳолат бўлади.

UFC президенти Дана Уайт узоқ вақтдан бери Трамп билан дўстона муносабатда бўлиб келган. У бир неча бор унинг кампанияларида қатнашган ва оммавий равишда қўллаб-қувватлаган.

Reuters маълумотларига кўра, шоуни ташкил этиш учун тахминан 700 минг доллар керак бўлади - жумладан, жанглардан кейин Оқ уйдаги майсазорни тиклаш учун ҳам.

UFC брендига эгалик қилувчи TKO Group Holdings бош компанияси бўлажак тадбирга ҳозирча расман изоҳ бермади.

Сана аллақачон эълон қилинган бўлса-да, жанглар харитаси ҳали тасдиқланмаган. Дана Уайт интервюда жангчилар билан музокаралар кейинроқ бошланишини, Конор МакГрегор билан шартнома ҳақидаги миш-мишлар эса «ҳақиқатга тўғри келмаслигини» таъкидлади.

Бундан ташқари, Оқ уй ҳам тадбир ўтказилишини очиқ тасдиқламади.

Мутахассисларнинг таъкидлашича, президент қароргоҳи ҳудудида бўлиб ўтадиган UFC жанги саволлар туғдириши мумкин - хавфсизлик ва молиялаштиришдан тортиб, бундай шоунинг рамзлари ва этикасигача.

Аввалроқ жангларни 2026 йил 4 июл - АҚШ Мустақиллик кунида ўтказиш ғояси муҳокама қилинган эди, бироқ «логистика сабабларига» кўра сана июнга кўчирилди.

UFC ва Оқ уй ҳозирча тафсилотлар, жумладан, томошабинлар сони, иштирокчилар рўйхати ва трансляция формати устида ишламоқда.

UFC (Ultimate Fighting Championship) - аралаш яккакураш жанглари (ММА) бўйича дунёдаги энг йирик ташкилот. 1993 йилда АҚШда ташкил этилган. Бугунги кунда у ўнлаб мамлакатларнинг энг яхши жангчиларини бирлаштирган жаҳон бренди бўлиб, 170 дан ортиқ мамлакатларда турнирларни трансляция қилади.

UFC октагон-арена (саккизбурчакли ринг) форматини оммалаштирди ва жанговар маҳорат, шоу ва бизнес уйғунлашган замонавий спорт саноатининг рамзига айланди. Ташкилот президенти - Дана Уайт, 2001 йилдан бери уни бошқаради. 2023 йилдан бери UFC WWE (кураш шоуси) билан бирлаштирилган ТКО Group Holdings корпорацияси таркибига киради.