17 май куни Петербургнинг Агалатова қишлоғида маҳаллий казаклар томонидан Россия президентининг антиқа бюсти ўрнатилди. Бу ҳақда “Невские новости” ахборот агентлиги хабар бермоқда.
Ҳайкалнинг ўзига хослиги шундаки, унда Путин Рим императори қиёфасига эга. Янги ёдгорликдаги Путин Рим аслзодаларининг тогасида, бошида ғалаба тимсоли бўлмиш дафна япроқларидан ясалган чамбар билан тасвирланган.
Қишлоқдаги хутор атамани Андрей Поляковнинг сўзларига қараганда, келажакда бюстни икки баробар каттароқ қилиб бронзадан ишлаш режалаштирилмоқда.
Le Figaro нашрининг ёзишича, казаклар Путиннинг Қримни Россия таркибига “қайтаргани” шарафига бу ҳайкални ўрнатган. Твиттерда эса ҳайкал Рим императори Нероннинг қиёфасига эга эканлиги таъкидлаб ўтилган.
Маълумот учун, Нерон (37-68) Римни 54-68 йилларда бошқарган император бўлиб, қонхўрлиги билан танилган. У Рим шаҳрига ўт қўйган, шунингдек, христианларни қатағон қилган шахс сифатида тарихда қолган.
