Тошкентда янги электромобиль тақдимоти ўтказилди

Тошкентда бўлиб ўтаётган VIII Республика инновацион ғоялар, технологиялар ва лойиҳалар ярмаркаси доирасида Турин политехника университети талабалари ўзлари ясаган электромобиль тақдимотини ўтказди.

Маълум бўлишича, электрокар қуёш батареяларида ишлайди. Унинг максимал тезлиги соатига 35-40 км ни ташкил қилиши мумкин. Машина икки ўринли.

Машинага ўрнатилган қуёш батареялари 400 ватт қувват ишлаб чиқариб бера олади. Аккумулятор тўла қувватлантирилгач, у билан 80 км йўл босиш мумкин. қуёшли кунда эса аккумуляторга энергия тўплаш талаб қилинмайди.
Ускуналар панели ўрнига машина навигаторли планшет билан жиҳозланган.