Шанхай ҳамкорлиги ташкилоти мамлакатларига хориждан терроризм таҳдиди кучаймоқда. Бу ҳақда ШҲТнинг хавфсизлик масалалари бўйича ўтказилган йиғилиши чоғида Тожикистон ички ишлар вазири Рамазон Раҳимзода маълум қилди.
"Ҳудудларимизга Яқин Шарқ, Афғонистон ва Ироқдан жангарилар кириб келиши эҳтимоли сақланмоқда", дейди у.
Унинг қўшимча қилишича, "ИШИД", "Ал-Қоида", "Толибон" ва "Биродар мусулмонлар" каби террористик гуруҳлар ШҲТ давлатларининг хавфсизлигига таҳдид солиши мумкин.
Раҳимзоданинг қайд этишича, Афғонистон ҳудудида гиёҳвандлик моддаларининг етиштирилиши ортгани террорчиларнинг молиявий жиҳатдан таъминланиб, фаоллашишига имкон бермоқда. У Тожикистон томони кейинги 15 йил ичида мамлакат ҳудудидан олиб ўтишга ҳаракат қилинган 150 тоннадан ортиқ гиёҳванд моддаларни тўхтатиб қолганини ва 70 миллиондан ортиқ кишини оғудан заҳарланишдан сақлаганини билдириб ўтди.
"Бу борадаги яна бир асосий муаммо Марказий Осиё мамлакатлари аҳолиси вакилларининг жангарилар томонидан ёлланиши бўлмоқда", дейди у.