Ғарбнинг бир қатор нуфузли босма нашрлари Баварияда ўтказилган “Кучли еттилик” саммити якунларига кўра келиб чиққан асосий хулосаларни умумийлаштиришга ҳаракат қилди. Бу борада чоп этилган материаллар ичида бир қатор жиддий фикрлар айтилди.
Жумладан, The Guardian нашри Барак Обаманинг Украинадаги вазият кескинлашган тақдирда Россияга қарши қўшимча санкциялар жорий қилиниши мумкинлиги ҳақидаги сўзларига эътибор қаратди. Италия, Буюк Британия ва Франция АҚШни бу борада қўллаб-қувватлашини билдирди. Шу билан бирга, Франция етакчиси Россия билан алоқаларни давом эттириш заруратини қайд қилиб ўтди.
The Financial Times колумнистининг фикрича эса, G7 етакчилари “Кремль кутганидан кўра қаттиқроқ” оҳангда огоҳлантириш беришди. Фақатгина Германия канцлери Ангела Меркель оғир риторикадан қочишга интилди.
Бундан ташқари, саммит иштирокчилари Украинани Минск келишувларига риоя қилиб, ҳокимият ваколатини Донбассга топширишга чақиришди. Аммо Украина бундай қадамни ташласа, ўз ҳудудий яхлитлигига болта урган бўлади. Шунга қарамай, етакчи давлатлар Украинага нисбатан позицияларини қаттиқлаштирмасдан, унга хайрихоҳлигини билдириб келмоқда.
The Independent газетаси Дэвид Кэмероннинг иккиланишларига эътибор қаратди. Обама Буюк Британиянинг ҳарбий харажатлари НАТОда белгиланган чегарадан пастга тушиб кетаётганидан хавотирдалигини билдирганида, Кэмерон ўз мамлакатининг жаҳон миқёсидаги мавқеи тушиб бораётганини тан олмади. У Бирлашган Қиролликлар “жиддий глобал ўйинчи” бўлиб қолаётганини яна бир бор эътироф этди.
Ўз навбатида, The Daily Telegraph Украина ихтилофи ва Россияга нисбатан сиёсат масаласи ишчи тушликка ажратилган вақтнинг учдан икки қисмини эгаллаганини таъкидлади.
АҚШ нашрлари эса саммитда ИШИДга қарши кураш масалалари муҳокама қилинганини биринчи ўринда тилга олиб ўтишди.
“Украина инқирози ва ИШИДнинг кучайиши гуруҳ саммити кун тартибида турган асосий мавзулардир”, – қайд қилиб ўтди The New York Times газетаси.
The Wall Street Journal нашрининг ёзишича, Еттилик давлатлари етакчилари кўпгина масалалар бўйича келишувга эриша олди. Шу билан бирга, улар Украинадаги ва Яқин Шарқдаги вазият бўйича аниқ хулосаларга кела олмади.
Франциянинг Le Figaro нашри эса Еттилик гуруҳи сингари халқаро сиёсат институтининг мавжудлиги қай даражада ақлдан эканлигини асосий мавзу сифатида кўтариб чиқди. Таъкидланишича, жаҳон етакчиларининг Бавария Альпларидаги икки кунлик баҳслари на Ғарбда, на дунёнинг бошқа қисмларида жиддий қизиқиш уйғотмади.
“Россияга нисбатан санкцияларни бекор қилиш вақти келмади, – деб ёзади Le Monde нашри. – G7 етакчилари, турли масалаларни муҳокама қилишдан ташқари, Москвага нисбатан бирдам ва қатъий позицияда турганини ҳам кўрсатмоқчи бўлди. Франсуа Олланд санкцияларнинг амал қилиш муддати янада узайтирилиши мумкинлигини айтиб ўтди. Бу масала 25-26 июнь кунлари Брюсселда бўлиб ўтадиган ЕИ саммитида кўриб чиқилади”.
