Футбол бўйича Нидерландия терма жамоаси бош мураббийи Гус Хиддинк ўз ўрнини тарк этиши мумкин. Бу ҳақда унинг ўзи De Telegraaf газетасига берган интервьюсида маълум қилган.
Газета журналисти бу мутахассис билан 12 июнь куни Латвия билан бўлиб ўтган ўйиндан кейин гаплашган. Евро-2016 саралаши доирасидаги бу ўйиндан кейин Нидерландия терма жамоаси "А" гуруҳида 6 ўйиндан кейин 10 очко жамғарган ҳолда учинчи ўринда турибди. Гуруҳда 15 очко билан исландияликлар етакчилик қилишмоқда. Иккинчи ўриндаги Чехияда эса 12 очко мавжуд.
"Мен терма жамоадаги ишимни давом эттириш ёки эттирмаслик борасида ўз қарашларимга эгаман. Аммо қарор қабул қилишдан олдин буни муҳокама қилиб олишим лозим. Бунга қанча вақт кетади? Балки бир соат ҳам етади", - дейди Хиддинк.
Ўтган йилнинг кузида ҳам ОАВда унинг ўз лавозимини тарк этиши ҳақида хабарлар тарқалганди. Кейинроқ Қироллик футбол уюшмаси уни ишдан бўшатмасликка қарор қилганди. Бунга унинг ўрнига муносиб номзод топилмагани сабаб бўлганди.
Маълумот учун, 68 ёшли Гус Хиддинк 2014 йилнинг мартида Нидерландия терма жамоаси бошқарувига келган, ундан олдин эса 2006-2010 йиллар давомида Россия терма жамоасида, 2012 йилдан "Анжи" жамоасида ишлаганди.