“Бунёдкор” жамоаси ярим ҳимоячиси Сардор Рашидов Қатарнинг “ал-Жайш” жамоасига ўтиб, у орқали Европага кетмоқчи. Бу ҳақда футболчи Championat.asia сайтига берган интервьюсида айтиб ўтди.
Илгарироқ Сардор Рашидов “ал-Жайш” жамоаси таркибига ўтиши ҳақида ахборот тарқатилган эди.
"Қишдаёқ менга кўплаб клублардан таклифлар келиб тушганди. Натижада мени муносиб бўлган жамоага қўйиб юборишмоқчи эди. Лекин “Бунёдкор”нинг олдида Осиё Чемпионлар лигаси баҳслари ҳам бор эди. Шунинг учун клубда қолиб халқаро майдондаги иштирокига ёрдам беришни хоҳладим. Жамоа ҳам кейинги тақдиримни биринчи даврадан кейин ҳал қилишини айтди. Мана, энди ўйлаган режаларимиз амалга ошади деб ўйлайман”, – унинг сўзларини келтиради нашр.
Бундан ташқари, Рашидов Қатар орқали Европа жамоаларидан бирига ўтиш нияти борлигини айтди:
“Европада ўйнаш ниятим борлигини айтганман. У ердан ҳам бир қатор жамоалар қизиқиш билдиришди. Айтишим керакки, Қатардан жуда яхши таклиф келиб тушди. Биласиз-ку, 2022 йили бу мамлакатда жаҳон чемпионати ўтказилади. Шунинг учун ҳозирданоқ жуда жиддий равишда тайёргарлик кўришмоқда. Бунинг учун миллий чемпионатини янада кучайтириш учун янги лойиҳаларни ишлаб чиқишяпти. Яқинда “Барселона”дан Хавини таклиф қилишда ва у “Ал Садд” билан шартнома имзолади. Бундан ташқари яна бошқа юлдуз ўйинчилар Қатар чемпионатига ошиқишяпти. Менга таклиф билан чиққан “Ал Жайиш” клуби ҳам катта салоҳиятга эга. Бу жамоа мен учун нотаниш эмас. Илгари чемпионлар лигаси баҳсларида “Ал Жайиш”га қарши ўйнаганмиз. Қатар футболи охирги йилларда кескин даражада ўсиб боряпти. Ушбу чемпионатда тўп суриш орқали кейинчалик Европага йўл олишим мумкин”.
Шунингдек, у жамоасининг охирги ўйинлари ҳақида фикр билдириб ўтди.
“ Эътибор берган бўлсангиз, биз асосан жамоавий ўйин кўрсатдик. Футболда ҳамжиҳатликда гап кўп. Ғалаба қозонишимизда ҳимоячиларимиз ва дарвозабонимизнинг яхши ўйин кўрсатганини ҳам алоҳида айтишни истардим. Бир сўз билан айтганда, бутун жамоа бўлиб яхши ҳаракат қилдик деб ўйлайман”, – деди у.
