Америкалик боксчи Флойд Мэйуэзер филиппинлик рақиби Мэнни Пакьяо билан ўтказган жанги учун камида 220-230 млн доллар ишлаб топди. Бу ҳақда ESPN телеканали орқали хабар қилинди.
Жангдан тушган пуллар қўли баланд келган америкалик спортчи фойдасига 60га 40 фоиз улушида тақсимланган эди. Пакьяо умумий ҳисобда 150 млн доллар ишлаб топди, аммо бу пулнинг бир қисмини промоутер Боб Арум олади. Бундан ташқари, даромаднинг бир қисми “Голден бой промоушнз” промоутерлик компанияси берилади. Ўз компаниясига эга бўлган Мэйуэзер бундай харажатлардан қутулиб қолди.
Икки боксчи ўртасидаги жанг пулли телетрансляциялар рекордини ҳам янгилади. Юқори сифатли трансляциянинг нархи 100 доллар бўлган ҳолда (оддий трансляция – 90 доллар) уни 4.4 млн киши томоша қилди. Ташкилотчилар трансляциядан 400 млн, чипталардан 72 млн доллар ишлаб топди.
Телекомпанияларга трансляция ҳуқуқининг сотилишини ҳам ҳисобга қўшсак, умумий даромад 600 млн долларни ташкил қилган.
Шу тариқа, Мэйуэзернинг pay-per-view тизими (тўғридан-тўғри эфирда намойиш этиладиган конкрет воқеани кўриш ҳуқуқини сотиб олиш) асосида кўрсатилган 14 жанги 1.3 млрд доллар пул тўплади.
