АҚШнинг Техас штатида яшовчи 75 ёшли Ванда Мобли исмли аёл йўл-транспорт ҳодисаси оқибатида йўл четидаги кўлга тушиб кетган. ЙТҲ оқибатида анча ўзини олдириб қўйган аёл икки кун давомида мажақланиб кетган автомобиль ичидан чиқа олмаган, деб хабар бермоқда Scripps Media.
Мобли хоним 183-трасса бўйлаб ўзининг Оклахома штатида яшовчи яқинлари олдига меҳмонга кетаётганда бирдан йўлда унинг рўпарасидан бошқа машина чиқиб қолган. Аёл тўқнашувдан қочиш мақсадида машинани четга бурган. Оқибатда машина пастликда жойлашган кўл четига тушиб кетган. Аёл жиддий жароҳатлар олмаган, бироқ кучдан қолган.
Аёлнинг айтишича, у ён-атрофдан ўтаётган автомобилларнинг овозини эшитган, бироқ машинадан мустақил ҳолда чиқиб, ёрдамга чақиришга мадори бўлмаган. Мобли ҳаво исиб кетганда кўлдаги сувдан ичиб, ўз чанқоғини қондирган.
Аёлнинг яқинлари унинг мобиль телефонига қўнғироқ қилишганда у жавоб беравермагач, ташвишлана бошлаб, бу ҳақда полицияга хабар қилишган. Полиция ходимлари аёлни қидиришни бошлашган. Бироқ аёлнинг набиралари полициячилардан кўра чаққонроқ чиқиб қолишди. Улар Мобли ҳаракатланган трассани эътибор билан текшириб чиққанларида, уриб туширилган йўл белгиси, автомобиль бўлакларини аниқлашган ва яқин орада ўз бувиларини ҳам топишга муваффақ бўлишган.
Ҳозир кекса аёл шифохонада даволанмоқда. Шифокорлар унинг белига шикаст етганини айтишмоқда. Уларнинг фикрича, аёл тез орада оёққа туриб кетади.