Буюк Британиянинг Лондон шаҳрида давом этаётган “Катта Дубулға” туркумига кирувчи “Уимблдон” теннис турнири ҳудудида ёнғин чиқди. Бу ҳақда The Daily Mail хабар қилди.
Марказий кортдан иштирокчилар, кўнгиллилар, мухлислар ва бошқа кишилар ёнғин ҳақидаги сигналдан кейин эвакуация қилинган.
Маълум бўлишича, ёнғин техник хоналардан бирида келиб чиққан. Лондон ўт очириш хизмати бу муаммони тезлик билан бартараф этган.
Эвакуация қилиш жараёнида 3 минг нафар атрофидаги киши ҳудуддан олиб чиқилган.
Ёнғинга Лондон шаҳрида кузатилаётган рекорд даражадаги иссиқ туфайли техник жиҳозларнинг ҳаддан ортиқ қизиб кетиши сабаб бўлгани аниқланган.
Ташкилотчилар бу ҳодиса куннинг иккинчи қисмида ўтказиладиган баҳслар графигига таъсир қилмаслигини айтишди.
Маълумот учун, Уимблдон теннис турнири 1877 йилдан буён ўтказиб келинади. Бу йилги баҳслар 29 июнь куни бошланган бўлиб, 12 июль кунигача давом этади.