"Атлетико" клубининг туркиялик ярим ҳимоячиси Арда Турон ўз фаолиятини "Барселона"да давом эттиради. Бу ҳақда каталонияликларнинг расмий сайтида маълум қилинган.
Маълум бўлишича, футболчи учун каталонияликлар "Атлетико"га 34 миллион евро тўлашган. Шунингдек, Арда Турон "Барселона"да муваффақиятли ўйнаб кетиши эвазига "Атлетико" яна 7 млн еврони бонус сифатида олиши мумкин.
Яқин вақт ичида футболчи "Барселона"да тиббий кўрикдан ўтиб, беш йиллик шартнома тузиши кутилмоқда.
"Барселона"га қўлланган тақиқ туфайли Арда Турон 2016 йилнинг январига қадар янги жамоаси таркибида майдонга туша олмайди.
Қайд этиб ўтиш жоизки, бу футболчи учун "Барселона"дан ташқари, "ПСЖ", "Челси" ва "Манчестер Юнайтед" жамоалари ҳам жиддий кураш олиб боришди.