14 июль куни Тошкентда Франциянинг миллий байрами – Бастилиянинг қулаши кунини нишонлашга бағишланган тадбир ўтказилди. Бу ҳақда “Туркистон пресс” агентлиги хабар бермоқда.
Тадбирда сўзга чиққан Франциянинг Ўзбекистондаги элчиси Жан-Анри Эльс икки давлат ўртасидаги алоқалар кенг миқёс касб этиб бораётганини таъкидлаб ўтди.
Жумладан, у 2014 йил ноябрида имзоланган ҳукуматлараро келишувга кўра 2015 йилнинг 1 июнида Тошкент француз альянсининг очилишини ўзаро ҳамкорликнинг муҳим саналаридан бири деб баҳолади.
Шунингдек, элчи Франция ишбилармонлари ҳаракати – MEDEF International делегациясининг Тошкентга келгани савдо ва иқтисодиёт соҳасидаги алоқаларнинг жонланишига сабаб бўлганини таъкидлаб ўтди. У бундан кейин ҳам икки давлат ўртасидаги алоқаларни чуқурлаштириш йўлида ишлашини айтиб ўтди.
